Хабаровскай куоракка ыам ыйын 12 күнүттэн 24 күнүгэр диэри Уһук Илин федеральнай уокуруктааҕы дьахталларга саахымат чөмпүйэнээтигэр биһиги кыргыттарбыт икки кыһыл көмүс уонна үс боруонса мэтээли ыллылар. Саахымаччыт кыргыттар үгэс быһыытынан үс диссипилиинэҕэ күрэхтэстилэр: блиц, түргэн уонна классическэй саахымакка.
Уһук Илин федеральнай уокуруктааҕы дьахталларга классическэй саахымат чөмпүйэнээтигэр муҥутуур кыайыылааҕынан Уус Алдантан сылдьар, уон сэттэ саастаах Евдокия Избекова буолла, кини тириэньэрдэрэ – М.И. Ушницкай, В.М. Таппыров. Оттон боруонса мэтээлин Дьокуускайтан сылдьар, 14 саастаах Полина Пак ылла, тириэньэрэ – Р.В. Ганжуров.
Евдокия Избекова
Уһук Илин федеральнай уокуруктааҕы дьахталларга түргэн саахымакка чөмпүйэнээтигэр бастакы миэстэни Дьокуускай куорат Национальнай гимназиятын үөрэнээччитэ, 14 саастаах Арина Васильева ылла, оттон үһүс миэстэҕэ Дьокуускай Саха-Корейскай оскуолатын үөрэнээчитэ Полина Пак тигистэ, тириэньэрэ - Р.В. Ганжуров.
Арина Васильева уонна Полина Пак
Уһук Илин федеральнай уокуруктааҕы дьахталларга блиц саахымакка чөмпүйэнээтигэр үһүс миэстэни Уус Алдантан сылдьар Евдокия Избекова ылла, тириэньэрдэрэ – М.И. Ушницкай, В.М. Таппыров.
Евдокия Избекова блиц саахымакка үһүс миэстэни ылбыта
Евдокия Избекова уонна Полина Пак бу сыл бэс ыйын 25 күнүттэн от ыйын 6 күнүгэр диэри, Калужскай уобалас Обнинскай куоратыгар ыытыллыахтаах дьахталлар икки ардыларыгар Арассыыйатааҕы Үрдүкү Лига чөмпүйэнээтигэр ыҥырылыннылар.
