Бэҕэһээ "Манчаары оонньууларын" мандатнай хамыыһыйатын 1899 спортсмен уонна улуустар дэлэгээссийэлэрин кыттыылаахтара этэҥҥэ ааспыттар. Онуоха 52 кыттааччы хамсыктан быһыыны ылбатах уонна ПЦР анаалыстара суох буолан оонньууларга кыттыбат буолбуттар.
Бу туһунан бырабыыталыстыба бэрэссэдээтэлин солбуйааччы Сергей Местников иһитиннэрбит. Уопсайа улуустартан уонна үрдүк үөрэх кыһаларыттан 40 хамаанда кыттар. Олортон 70 бырыһыаннара быһыыны ылбыттар, оттон 30 бырыһыан кыттааччы ПЦР анаалыстаах.
"Бэҕэһээ Абый уонна Өлөөн хамаандаларын икки чилиэнэ ПЦР анаалыстара ыалдьыбыт диэн көрдөрбүт. Ол иһин тэрийээччилэр хамаанданы бүтүннүү буолбакка, бу икки киһиттэн ураты быһыыны толору ылбатах дьону туоратарга быһаарда", - диэн Сергей Местников быһаарда. Кыттааччылар анаалыстарын Дьокуускайга туттарбыттар, Бэрдьигэстээххэ тиийбэтэхтэр.
Маны таһынан, хамаандаларга быһыыта да, анаалыһа да суох кыттааччылар бааллар. Олору оонньуулартан туораттылар. 52 киһи — 22 спортсмен уонна 30 улуустар дэлэгээссийэлэрин кыттыылаахтара туоратыллыбыттар.
