21 саастарын туола илик Саха сирин чиэһин көмүскээччи эдэр дзюдоистар бастыыр иһин күрэхтэригэр ситиһиилэрэ үксээн иһэр.
Өскөтүн ааспыт сырыыга Аина Моисеева кыһыл көмүс мэтээли, оттон Саина Петрова үрүҥ көмүһү ылбыт эбит буоллахтарына, бу 23-с чыыһылаҕа Карина Ефимова кыайыылаах буолары ситистэ.
Саха сирин кыысчаана Карина Ефимова 52 киилэҕэ диэри ыйааһыннаахтарга кытынна. Маҥнайгы эргииргэ Оренбург куораттан сылдьар Веронику Ланкинаны, ол кэнниттэн Бурятияттан Анастасия Лебедеваны, Москваттан Суман Артыкованы кыайбыта. Бүтэһик көрсүһүүгэ Осетияттан сылдьар Татьяна Жданкиналыын киирсэн хоппута уонна эрэллээхтик кыайыылааҕынан тахсыбыта. Финал аҥаарыгар дойдубут кыыһа Ангелина Жукованы кыайбыта, онтон кыһыл көмүс мэдээл иһин Диана Гогашидзе-Филькиналыын киирсиигэ кыайыыны ситиспитэ.
Дамдиндоржа Гомбодоржа тириэнэрдээх Саха сирин талыллыбыт хамаандатыттан үс спортсмен финалга таҕыста уонна дойдуга бастыыр иһин күрэхтэн өрөспүүбүлүкэҕэ мэтээллэри аҕалла.
спортСанатар буоллахха, эрдэ 48 киилэҕэ диэри ыйааһыннаах категорияҕа Анна Моисеева кыһыл көмүс мэтээлинэн бэлиэтэммитэ, оттон 44 киилэҕэ диэри иккис үрдэлгэ Саина Петрова тахсыбыта. Үһүөн кэлэр сезоҥҥа дойду талыллыбыт хамаандатыгар киириэхтэрэ.
Дойдубутугар 21 саастарын туола илик ыччакка бастыыр иһин күөн-күрэс Екатеринбург куоракка сэтинньи 22-23 күннэригэр ыытылынна. Манна 600 тахса спорстмен кыттыыны ылла – 374 юниор уонна 253 кыыс аймах. Бу күрэх Арассыыйа талыллыбыт хамаандатыгар бастыҥнары талыы эрэ быһыытынан буолбакка, 2024 сылга диэри Олимпийскай оонньууларга анаан сыал-сорук туруорунуу быһыытынан эмиэ ыытылынна.
Источник: ЯСИА
