Ньиэп хостуур “Роснефть” НХ иһинэн тэриллэн үлэлиир “Таас Үрэх Нефтегазодобыча” тэрилтэ икки улахан тэрээһин – мас тардыһыытыгар аан дойду VI чөмпүйэнээтин уонна Саха сирин норуоттарын VIII Успуорка оонньууларын – успуонсар-партнёра буолла. Успуорт бу икки улахан бырааһынньыга – Саха АССР төрүттэммитэ 100 сылын бэлиэтиир үбүлүөйдээх сыл бэлиэ түгэнэ.
– Биһиги хампаанньабыт корпоративнай, успуонсардыыр аһымал хамсааһыннары өйөөн, олорго көхтөөхтүк кыттан бүтүн эрэгийиэн социальнай-экэнэмиичэскэй сайдыытыгар бигэ тирэх буолар, – диэн “Таас Үрэх Нефтегазодобыча” ХЭУо Саха сиринээҕи бэрэстэбиитэлистибэтин салайааччыта Петр Алексеев этэр. – “Роснефть” хампаанньа уонна Саха сирэ бииргэ үлэлэһэр сөбүлэҥнэрин чэрчитинэн, биһиги тэрилтэбит өрөспүүбүлүкэҕэ социальнай суолталаах бөдөҥ аһымал бырайыактары олоххо киллэрэр. Бу сылга туох үлэ ыытыллыбытын кылгастык кэпсээтэххэ, оҕо оонньуур, успуорт былаһааккаларын тутарга СӨ Үүнэр көлүөнэ тус сыаллаах пуондатыгар үбүнэн-харчынан көмөлөһөн турар. Былаһааккалар биэс муниципальнай тэриллиигэ – Дьокуускайга, Ленскэйгэ, Горнай Орто Сурт, Уус Алдан Мындааба, Мииринэй Таас Үрэх нэһилиэнньэлээх пууннарыгар – тутуллаллар. Маны таһынан, Мииринэй оройуонун киин балыыһатыгар мэдиссиинэ тэриллэрин уонна инбэнтээрин атыылаһалларыгар харчынан көмөнү оҥорбута.
Саха успуордун өйөөн, “Таас Үрэх Нефтегазодобыча” успуорт национальнай көрүҥнэрэ маассабай көрүҥнэр быһыытынан сайдалларыгар, киэҥник тарҕаналларыгар дьулуһар. Ол курдук, Орто Ботуобуйатааҕы ньиэп-гаас конденсаттаах сиргэ, Нефтяник күнүгэр сөп түбэһиннэрэн, мас тардыһыытыгар уонна ыстаҥаҕа сыл аайы күрэхтэр тэриллэллэр. Сыала – эрэгийиэннэргэ саха успуордун төрүт көрүҥнэрин сайыннарыы, киэҥ эйгэҕэ таһаарыы. Манна бэлиэтээн эттэххэ, тэрилтэ Орто Ботуобуйатааҕы салаатыгар дойду 40 эрэгийиэниттэн уопсайа 400 кэриҥэ киһи үлэлиир.
Итини таһынан, бу күннэргэ Саха АССР төрүттэммитэ 100 сылынан Орто Ботуобуйатааҕы ньиэп-гаас конденсаттаах сиргэ ньиэп үлэһиттэригэр мини-футболга, волейболга күрэхтэр буола тураллар. Киэҥ хабааннаах турнирдар маҥнайгы уонна иккис вахталары хабан икки түһүмэхтээн ыытыллаллар. Барыта 200 үлэһит кыттар. Күрэхтэр түмүктэринэн, бастыҥ хамаандалары Ньиэп уонна гаас бырамыысыланнаһын үлэһиттэрин күнүн бэлиэтиир бырааһынньык чэрчитинэн ыытыллар тэрээһиннэргэ наҕараадалыахтара.
Үлэһиттэр уонна кинилэр дьиэ кэргэннэригэр чөл олоҕу бырапагаандалааһын – “Таас Үрэх Нефтегазодобыча” корпоративнай бэлиитикэтин биир соруга. Үлэһиттэр кыһын уонна сайын сылын аайы улахан хамаанда тэринэн, “Роснефть” хампаанньа тэрийэр успуорт оонньууларыгар кытталлар. Быйыл ХVII төгүлүн ыытыллар сайыҥҥы успуорт оонньууларыгар “Таас Үрэх Нефтегазодобыча” чиэһин 40 кыттааччы көмүскүөҕэ. Олор ортолоругар Дьокуускай уонна Ленскэй офистарын үлэһиттэрэ бааллар. Ньиэп үлэһиттэрин түмэр түһүлгэ Тюмень куоракка атырдьах ыйыгар ыытыллыаҕа. Хампаанньа бастыҥ спортсменнара баскетболга, волейболга, остуол тиэнниһигэр, мини-футболга, чэпчэки атлетикаҕа, саахымакка, билийээргэ, икки буолан күүһү холонор киирсиигэ, ханаат тардыһыытыгар илин-кэлин түсүһүөхтэрэ.
