Кулун тутар 4 күнүгэр Аан дойдутааҕы дьахтар бырааһынньыгын көрсө «Миссис Алдан Саха сирэ» куоҥкурус ыытыллыахтаах. Бэлэмнэнии чэрчитинэн, манна «Ойуу киинэ дьоруойа» бырайыагы тэрийдилэр.
«Миссис Алдан Саха сирэ» куоҥкурус үһүс сылын ыытыллар. Кыайыылаах салгыы Бүтүн Арассыыйатааҕы уонна Аан дойдутааҕы күрэстэргэ оройуонун аатын көмүскүү барыахтаах. Ол туһунан куоҥкурус дириэктэрэ уонна бырайыак фотограба Антонина Бочкарева кэпсээтэ:
«Куоҥкуруска кыттар кэрэ аҥаардар принцесса оруолугар холонон көрөргө үөрүүнү кытта сөбүлэспиттэрэ. Кинилэр ойуу киинэлэртэн (мультиктартан) сөбүлүүр персонажтарын таланнар, ону үтүктэн хаартыскаҕа түһүөхтээхтэр этэ. Кыттааччылар уобарастарын бэйэлэрэ толкуйдаатылар», - диэн кини астыммытын биллэрдэ.
Тэрийээччилэр кыттааччылар уобарастарыттан олус астыммыттар. “Хас биирдии персонаж дьиҥнээх курдук буолбут”, - диэн кинилэр үөрэллэр-көтөллөр. Оттон эһиэхэ санааҕытыгар хайдаҕый? Ордук ханнык дьоруой табыллыбытый?
Сонун төрдө: «Миссис Алдан Cаха сирэ» куоҥкурус тэрийэр кэмитиэтэ
