Бэҕэһээ Дьокуускай мээрэ Евгений Григорьев Туймаада ыһыаҕын кэмигэр буолбут биир дьоҕус мунньахха “бомжтары ЛТПга ыытыахха наада” диэбитэ тарҕанан, сири-сибиири аймаата. Дьон санаата хайынна. Ону эрэ күүтэн олорбуттуу, киин СМИлэр суруйан сурдурҕаппытынан бардылар.
Аймалҕан, ырытыы сытыырхайбытынан, Евгений Григорьев чопчу кимнээҕи ЛТПларга ыытар сөбүн, кими аһынарын, кими аһымматын туһунан быһаарда. Кини этэринэн, суруналыыстар мээр этиититтэн биир кылгас кэрчиги ойо тутан, ону “туустаан-тумалаан”, итинник айдааны таһаарбыттар.
“Уулуссаҕа ускул-тэлскил сылдьар дьону араарыахха наада. Бастакы бөлөххө сатаан үлэлиир-хамсыыр кыахтаах, икки илиилээх, икки атахтаан дьон киирсэллэр. Кинилэр тутууга, уһугар тиийэн, суол-тиэргэн да харбааччынан үлэлээн, дьоҥҥо-сэргэҕэ туһалыахтарын сөп. Ол гынан баран, кинилэр инньэ гымматтар. Бөлөҕүнэн сылдьан, уопсастыба олоҕурбут бэрээдэгэр, өйүгэр-санаатыгар сөп түбэспэт олоҕунан олороллор. Арыгы иһэллэр уонна ааһан иһэр дьоҥҥо сыстаҥныыллар, арахпакка буулууллар. Биһиэхэ ол туһунан элбэх үҥсүү киирэр.
Кырдьык, оннук дьону биһиги аһыммаппыт. Кинилэри кытта үлэлиибит, аахсыйалары тэрийэбит, НКОларга көмөлөһөбүт, тэрилтэлэргэ киллэрэбит, аһатабыт-таҥыннарабыт эрээри, дьоммут кэлин тиһэҕэр куотан хаалаллар уонна эмиэ уулусса төннөн, уруккуларыгар түһэллэр. Мин санаабар, кинилэргэ эппиэтинэһи сүктэриэххэ, эмтэнэр-үлэлиир профилакторийдары (ЛТП) тэрийиэххэ наада. Ол биһиги эһэлэрбит уонна хос эһэлэрбит олохтообут үтүө холобурдара. Дьону социумҥа үлэнэн төннөрүөхтээхпит. Өй-санаа уонна эт-хаан чэбдигириитинэн.
Иккис бөлөххө олох ыарахаттарын көрсүбүт, доруобуйаларын туругунан үлэлиир кыаҕа суох дьон киирсэллэр. Холобур, инбэлииттэр. Кинилэри көрүү-харайыы – судаарыстыба соруга. Кини оннук дьону толору хааччыйыахтаах. Дьиҥэр, мин ыһыах кэмигэр буолбут пресс-кэмпириэнсийэҕэ итинник хоруйдаабытым. Онтон ити биир этиини быһа тардыбыттар.
ТАСС хаартыскалара
