Покровскайдыыр суол 12-с килэмиэтиригэр хаһан эрэ учаастак ылан дьиэ туттубут Афанасьевтар дьиэ кэргэннэрэ дьиэтэ-уота суох уулуссаҕа хаалар кутталлаахтарыттан куттаналлар. Мөккүөр, суут үөһэ суут, быһаарыы ылыныллыыта – ити барыта ааспыта-буолбута эрээри, “Сахатранснефтегаз” бииртэн-биир бүппэт ирдэбиллэри түһэрэн, ыал дьон сэниэлэрин, сыраларын-сылбаларын эһэригэр, хара көлөһүннэрин супту уулууругар тиийдэ.
“Хатасский беспредел” диэн тыл ситимин куорат олохтоохторо истэр-билэр буолбуттара хас да сыл буолла: ити барыта Дьокуускайга Покровскайдыыр суол 12 килэмиэтиригэр уонча сылтан бэттэх сир учаастагын ылан, дьиэ-уот туттан испит ыалларга сыһыаран этиллэр. Кинилэр сорохторо бары быраабыланы тутуһан, биир сокуону кэспэккэ, “тыа хаһаайыстыбатыгар” туттуллуохтаах сирдэрин “чааһынай дьиэни туттарга” диэҥҥэ көһөрбүттэрэ ыраатта.
Ол туһунан СӨ Норуот фронун хос бэрэссэдээтэлэ (сопредседатель) Алексей Лаптев иһитиннэрдэ.
Ол курдук, Афанасьевтар дьиэ кэргэн “Сахатранснефтегаз” АУо диэн өрөспүүбүлүкэ биир саамай улахан уонна тутаах тэрилтэтин кытта инньэ 7(!) сылы быһа сууттаспыттара. Ол түмүгэр, 2023 сыл балаҕан ыйыгар, суут уурааҕынан дьиэлэрин уонна тиэргэннэригэр баар хаһаайыстыбаннай тутууларын барытын көтүрэр туһунан докумуону – “исполнительный лист” диэни – туппуттара. “Сахатранснефтегаз” тэрилтэ ол хоромньутун дьиэ-уот көтүрүллүөн иннинэн харчынан толуйуохтааҕа. Хомойуох иһин, “ол гынан баран” диирбитигэр тиийэбит. Судаарыстыбаннай тирилтэ өссө төгүл суут быһаарыытын ааһына сатаабыта.
2023 сыл ахсынньы 12 күнүгэр Владивосток куоракка баар Кассация тохсус суута быһаарыыны Афанасьевтар тустарыгар ылбыта уонна “Сахатранснефтегаз” түһэрбит ирдэбилигэр (иск) толору аккаастаабыта.
Афанасьевтар “исполнительнай лииһи” Дьокуускайга “Сбербааҥҥа” туттарбыттар, ону бэрт өр көрбүттэр. Инньэ гынан, кумааҕы иирбэтиттэн-таарбатыттан сылтаан “лииһи” кулун тутар 12 күнүгэр биирдэ эрэ ылан, сайабылыанньаны бириистэптэр куораттааҕы отделларыгар (УФССП) биэрбиттэр.
Ол гынан баран, олунньу 12 күнүгэр суут бириистэптэрэ “Сахатранснефтегаз” сайабылыанньатынан Афанасьевтарга сыһыаран “исполнительнай производствоны” көбүтэн, баара-суоҕа 1 күн иһигэр олорор дьиэлэрин көтүрэ охсорго модьуйбут! Онтон Афанасьевтар албакааты кытта приемҥа бара сылдьыбыттарын кэннэ (толорооччу-бириистэп ыҥырыытынан), толорооччу-бириистэп сыыспытын, алҕаһаабытын билинэн, бэйэтин бэйэтэ куораттааҕы суукка үҥсүбүт. Кулун тутар 4 күнүгэр суут Афанасьевтар тустарыгар “исполнительнай производствоны” тохтотор туһунан быһаарыыны таһаарбыт.
Дьиҥэр, бу үөскээбит быһыыга-майгыга боростуой дьон барахсаттар туох даҕаны буруйдара суох эбээт. Оттон “Сахатранснефтегаз” тэрилтэ салайааччыларын дьоҥҥо сыһыана киһини соһутар, сөхтөрөр.
Норуот фрона хампаанньаҕа ити дьыалаҕа сыһыаран суругунан ыйытыы ыыппытыгар, хампаанньа үлэһиттэрэ бастаан Афанасьевтар олорор дьиэлэрин көтүрүөхтээхтэрин, ол кэннэ биирдэ эрэ хоромньуну толуйар харчы төлөнүөхтээҕин туһунан хоруйдаабыттар. Төһө эмэ төлөбүр эрдэттэн оҥоһуллуохтааҕын (предверительная) үрдүнэн. Онон, Норуот фронун бэрэстэбиитэллэрэ толорооччу-бириистэп хаһан эрэ Афанасьевтар дьиэлэрин баара-суоҕа 1 күн иһигэр көтүрэ охсорго дьаһайбытын курдук, “Сахатранснефтегаз” тэрэлтэни утары бэрт түргэнник “исполнительнай производствоны” көбүтэ охсуо уонна боростуой ыалга эмиэ 1 күн иһигэр хоромньутун төлөтүө диэн эрэнэллэр.
Yakutia24/Якутия24 ситим таһаарыыта
