ХАТТААН ТӨРӨӨҺҮН (РЕИНКАРНАЦИЯ)
Ыар айыыны оҥорбуттар (киһини өлөрбүттэр, бэйэлэригэр тиийиммиттэр, дьоҥҥо куһаҕаны оҥорор, куһаҕаны баҕарар хара санаалаахтар о.д.а.) тута Аадка атаарыллаллар. Итинник дьон Дууһалара хаттаан төрөөбөттөр, ол аата Орто да Үөһээ да дойдуга төннүбэттэр. Бу Айыы Таҥара Үчүгэй дьону талар, Куһаҕан дьонтон ыраастанар ньымата (Божественный отбор – естественный отбор курдук) буолар. Оччоҕо Орто Дойду сыыйа куһаҕан дьонтон ыраастанан Үчүгэй дьон ахсаана элбээн, ол дьон салгыы сайдан Айыы таһымыгар тахсыахтаахтар.
ХАТТААН ТӨРӨӨҺҮН
Хаттаан төрөөһүн туһунан өйдөбүл үгүс норуоттарга, итэҕэллэргэ уонна религияларга эмиэ баар.
Киһи Дууһата Орто Дойдутааҕы олоҕун уратыларын, туох саҥа баарын туһунан сонуну барытын илдьэ барар. Онтон олохсуйбут Халлааныгар тиийэн салгыы үөрэнэр. Үөрэммит үөрэҕэ Дууһаны салгыы байытар, сайыннарар. Ону кытта Дууһа киэбэ эмиэ уларыйар.
Ханна да буоллун, Дууһа Аньыыны да Үтүөнү да оҥороро көҥүл. Хайа да Халлааҥҥа олорон Аньыыны оҥрдоҕуна онто Хара ньэгиргэ (эниэргийэҕэ), Үтүөнү оҥордоҕуна – Үрүҥ ньэгиргэ кубулуйан мунньуллан иһэр.
Кэмэ кэллэҕинэ Дууһа Үрүҥ ньэгирэ баһыйан, көтөҕөр күүһэ үрдээн Үрдүкү сытар Халлааҥҥа, бэл Ырайга тиийэ тахсыан сөп. Оттон Хара ньэгирэ баһыйдаҕына Аллара сытар Халлааннартан биирдэригэр, олус улахан Аньыылаах буоллаҕына Аадка тиийэ түһүөн сөп.
Биир Халлаантан атын Халлааҥҥа Дууһа көһүүтэ Хаттаан төрөөһүн (Реинкарнация) диэн ааттанар. Ол аата Дууһа саҥа Халлааҥҥа тахсан хаттаан төрүүр.
Бастакы уонна Иккис Халлааннарга – Айыыһыт уонна Иэйиэхсит Халлааннарыгар, киһи өллөҕүнэ Дууһата көтөрүгэр бу Халлааннарга тохтооботун курдук, баларга эмиэ Дууһалар олохсуйбаттар, сылдьан эрэ ааһаллар.
Дьиктитэ диэн, Үөһээ Халлааннарга олорон үгүс Аньыыны оҥорбут, онон ботуччу соҕус Хара ньэгири мунньуммут Дууһалар Орто Дойдуга Аньыыларын боруостуу хаттаан төрүүллэр (Реинкарнация).
Орто Дойдуга хаттаан төрүүр Дууһалар Бастакы Халлааҥҥа – Айыыһыкка сылдьан Оҕо Кутугар (Дууһа - Оҕо төрүөр диэри Оҕо Кута диэн ааттанар) кубулуйаллар.
Айыыһыт Хотун Орто Дойдуга түһэн Оҕо Кутун (Дууһатын) Эр киһи оройунан үрэн киллэрэр.
Онтон Дууһа Эр киһи сиэмэтигэр (сперматазоид хромосоматыгар – Уол буоллаҕына Атыыр, Кыыс буоллаҕына – Тыһы хромосома ДНК-тын иһигэр) киирэн уйаланар.
Дууһа уйаламмыт сперматозоида, кыймаҥнаан-элэгэлдьийэн атыттартан таһыччы сыыдам уонна күүстээх буолар, ол иһин 40 мөлүйүөн сперматозоидтан (киһи биирдэ түһэрэр сиэмэтигэр итиччэ сперматозоид баар буолар) ити эрэ сперматозоид Дьахтар сымыытын буоһатар.
Хаттаан төрөөбүт киһи сороҕор үүт-үкчү урукутун курдук, үксүгэр, Ыйааҕа, киэбэ уларытыылардаах буолан сирэйэ-хараҕа, киэбэ-киэлитэ, толкуйа урукку киһиттэн букатын атын, онон билиҥҥи олохтоох усулуобуйаҕа ордук сөп түбэһимтиэ буолар. Ол иһин киһи хас саҥа күлүөнэ төрүөх ахсын улам-улам сайдан, тупсан иһэр.
Хаттаан төрөөбүт киһи Дууһата ханнык Халлааҥҥа тахсан туохха үөрэммитинэн дьоҕурдаах буолар. Ол дьоҕурун таба тайаммыт киһини Талааннаах Киһи дииллэр.
Ахсыс Халлааҥҥа тахсыбыт (Одун, Чыҥыс Айыылар халланнара) Дууһалары (оннук Дууһа атыттартан быдан аҕыйах буолар) Айыы Тойон Таҥара Академиятыгар анаан үөрэтэллэр. Ити үөрэҕи сэргэ урут Дууһалар хомуйан кэлбит сонуннарын (информация) учуоттаан, Дууһа киэбигэр уонна Ыйааҕар (программатыгар) Айыы Таҥара улахан уларытыылары киллэрэр. Ол кэнниттэн Дууһаны Сиргэ төттөрү ыыталлар.
Бу Айыы Таҥара Орто Дойду дьонун тупсарарга анаан бэлэмнээбит дьонноро. Итинник дьоннор киһи аймах сүөгэйэ-сөлөгөйө, атыннык эттэххэ омук Элитата буолар аналлаах төрүүллэр. Дьон кинилэри Одунтан оҥоһуулаах, Чыҥыстан ыйаахтаах дьонунан билинэр.
Сэттис Халлааҥҥа (Дьылҕа, Таҥха, Билгэ Айыылар халланнара) Дууһалар Билиини баһылыырга үөрэнэллэр. Онно олус билээҕимсийэн, элбэх Аньыыны оҥорон, Орто Дойдуга төттөрү төрүүллэр. Бу Дууһалар олохсуйбут дьонноро Сир Түннүгэ, бөлүһүөк, учуонай, үөрэхтээх, билиилээх дьон буолаллар. (1 Ойуу)
Алтыс Халлааҥҥа (Аан Дьааһын Айыы халлаана) Дууһалар ылбыт билиилэрин Орто Дойдуга хаттаан төрүүллэригэр эмчит, отоһут, психолог буоллахтарына толору туһаналлар. Сорохтор чараас эйгэни кытары алтыһар кыахтаналлар (экстрасенстар). ( 2 Ойуу)
Бэһис Халлаантан (Улуу Суорун Айыы халлаана) түспүт Дууһалар олохсуйбут дьонноро бэртээхэй Тимир, Мас ууһа, Иистэнньэҥ, Олоҥхоһут, Ырыаһыт, Суруйааччы, Учуутал буолаллар (3-4-5-6-7-8 Ойуулар)
Улуу Суорун оскуолатыгар үөрэнэн хаттаан төрөөбүттэртэн Хараҥа күүстэр талан ылан Ойуун оҥоруохтарын сөп.
Төрдүс Халлааҥҥа (Хотой Айыы халлаана) Дууһаларга Тэрийэр, түмэр-дьаһайар дьоҕуру иҥэрэллэр. Маннык Дууһалаах дьон Салайааччы, Лиидэр, Дьокутаат буолар аналлаах төрүүллэр. Хомойуох иһин сорохторго ол кыахтарын толору туһаннартарбаттар (9-10 Ойуу)
САХАЛАР ТОҔО БЭЙЭЛЭРИН ДЬӨҺӨГӨЙ УЛУУҺУН ДЬОНОБУТ ДЭНЭЛЛЭРИЙ?
Былыр саха дьонун Дууһата үксэ Үһүс Халлааҥҥа (Дьөһөгөй Айыы Халлаана) эрэ ыттар кыахтаах эбит. Ол иһин саха киһитэ Дьулуурдаах, Дьүккүөрдээх, Тулуурдаах буолбут. Ол түмүгэр Дьөһөгөй Айыы биэрбит үөрэҕинэн Сылгыһыт, Сүөсүһүт, Булчут-алчыт идэтин толору баһылаабыт, бу тыйыс айылҕалаах Хоту дойдуну иччилээбит (11-12-13 Ойуулар) Ити идэлэртэн сахаларга Сылгы иитиитэ чугас, сылгыны хайа да кэмҥэ маанылыыр, өрө тутар үгэстээх. Үтүмэн үгүс кэмҥэ Саха Дууһата Үһүс Халлаантан түһэр буолан, кини Дьөһөгөй Айыы Халлааныттан төрүттээҕин сүрэҕинэн-быарынан, этинэн-хаанынан, өйүнэн-санаатынан таайан өтө билэр. Ол иһин саха былыр-былыргыттан Дьөһөгөй улууһун оҕотунан ааҕынар.
Биллэн турар, сахалартан Дууһалара Ырайга тиийбиттэр, араас халлааннарга тахсан олохсубуттар баар буоллахтара. Ол гынан баран, оннук Дууһалар аҕыйахтар, үгүстэрэ 3-с Халлааҥҥа эрэ тиийэллэр быһыылаах.
Саха курдук көнө, саха курдук Айылҕалыын тапсан алтыһар кыахтаах дьиҥнээх Айылҕа оҕото туох айылаах оннук Айыытын-харатын оҥорон, Дууһата 3-с эрэ Халлааҥҥа тахсарый диэн бэрт кэрэхсэбиллээх ыйытык үөскүөн сөп.
Итиннэ, былыргы Тенгрианство өйдөбүлүгэр олоҕуран быһаардахха, Айыы Тойон Таҥара уонна Арсан Дуолай кыр өстөөхтүүлэр эбит. Орто Дойдуга Айыы Таҥара Алгысчыттардаах, оттон Арсан Дуолай – Ойууттардаах.
Былыргы саха киһитэ барахсан туох эмэ ыарахаттары көрүстэҕинэ, ордук ыарыйдаҕына Ойууну ыҥыран кыырдарар үгэстээҕэ. Айыы Тойон Таҥара итини Миигин умнан Арсан Дуолайга сүгүрүйэҕит диэн хомойон улахан Аньыынан ааҕара. Дьэ ол Аньыытын ньэгирэ аллара тардан Саха киһитин Дууһата Үһүс Халлааҥҥа тахсан олохсуйара уонна кэмэ кэллэҕинэ Орто Дойдуга төннөн хаттаан төрүүрэ.
Хаттаан төрөөбүт киһи урукку олоҕун туһунан өйдөбүл төрүт өйүгэр баар буолан баран, ону кини оччугуй оҕо эрдэҕинэ, ханнык эмэ тоҕоостоох түбэлтэҕэ эрэ кыратык удумаҕалаан ылыан сөп. Улаатан баран урукку олоҕун өйдөөбөт.
КИҺИ ДУУҺАТА ХАТТААН КЫЫЛ-СҮӨЛ БУЛАН ТӨРҮӨН СӨП ДУО?
Сорох итэҕэллэргэ киһи хаттаан Сиргэ Кыыл, Көтөр буолан түрүөн эмиэ сөп диэн өйдөбүл баар (14 Ойуу).
Таҥараианство тыынар-тыыннах барыта 4 куттааҕын уонна Дууһалааҕын билим таһымынан дакаастыыр уонна онно олоҕуран ити этиллибит өйдөбүлү утарбат.
Таҥараианство этэринэн, кыылы-көтөрү кэрээнэ суох кыдыйбыт, Ийэ айылҕатын улаханнык эмсэҕэлэппит, онон улахан аньыыны-хараны оҥорбут эрэ киһи иккистээн Кыыл-сүөл буолан төрүөн сөп диэн быһаарар.
