Бу хаартысканы көрбүт дьон, бука, Мииринэй сылаас сир буолан, саас эрдэ кэлбит диэн үгэргиэхтэрин, сэтэриэхтэрин сөп. Кырдьык, бөрүкүтэ суох көстүү. Түөрт этээстээх дьиэ аннынан, уһун дьуруу мууһунан чэҥэрийэ сытар.
Сатыы дьон халтырыйан тас иэннэринэн барыахтарын, массыыналаахтар да моһуогуруохтарын сөп.
Сылын ахсын - итинник дьаабы.
Тоҕо диэтэххэ, бу 1967 сыллаахха тутуллубут дьиэ, туох баар инженернэй утума дьэбиннирэн, хаҕа эрэ хаалан турар. Ханнык да ууну-хаары туппат.
Эбиитин дьиэ аннынан амырыын сыттаах холохойунан устааччы.
Бу туһунан хаста да суруйан, олохтоох былаастары өһүргэтэн турабын.
Даҕатан эттэххэ, бу дьиэҕэ иллэрээ сыл уонна былырыын хаппытаалынай өрөмүөн ыытыллыбыта. Тоҕо турба-ирбэ чааһынан дьарыктамматахтара дьикти.
Дьэ сүрдээх, көрүөхтэн сүөргү. Оттон маннык туруктаах дьиэлэр, хаарбах хоммунаалынай утумнар куораппытыгар үгүстэр.
Станислав Алексеев. Мииринэй куората. Ааптар хаартыската.
