Киир

Киир

Хой

Ситиһиини кытта сиэттиһэ сылдьар буолаҥҥын, саҥа кыах бөҕө арыллар. Ол эрээри, киһии тылын өйдөөбөт өһөс кэллиэгэҕин кытта мөккүһэн бүт. Туһата суох. Үлэҥ сорудаҕар барытыгар ылсан ис, оттон дьиэ кэргэҥҥэр тус бэйэҥ интуицияҕын эрэн. Оччоҕо туох барыта табыллан иһиэ. Таптал “фронугар” эмиэ саҥа кыахтар үөскүөхтэрэ. Эйиэхэ саҥа сүгүрүйээччи көстөр чинчилээх. Тэһийбэт буоллаххына, кинилиин саҥа сыһыаны олохтуоххун сөп.

Оҕус 

Аһара бугуһуйан, өрүкүйэн хаалбыккын. Наар карьераҕын салгыы хайдах оҥороргун, саҥа идиэйэни буларгын толкуйдаан тахсаҕын. Сарсыҥҥы күҥҥүн улахан эрэли кытта күүт. Эн, уопсайынан, уу-нуһараҥ олоххо, мааныга-далбарга эрэ ананан төрөөбүт киһигин. Таптал чааһыгар табыллыы, кыайыы күүтэр. Өйгүн эрэ сүтэримиэххин наада. Хобу-сиби итэҕэйимэ, интэриниэт эйгэтигэр ааккын-суолгун харыстаа.

Игирэлэр 

Олоххор саҥа быраабыланы киллэр: үлэҕэр бэйэҥ былааҥҥынан үлэлээ, оттон дьиэҕэр үлэни-хамнаһы тыыран, үллэрэн наардаа. Наһаа ирдэбиллээх, салгымтыа  буолартан, дьону “үөрэтэртэн” туттун. Нэдиэлэ бүтүүтүгэр үп-харчы дьыалата табыллыан сөп. Үлэҕэр үрдүүр, ситиһиилэнэр кыах үөскүө. Өрөбүллэргэ доруобуйаҕын көрүн, халлаан дьыбарданна, тымныйыаххын сөп. Тапталга соһуччу сонун күүтэр.

Араак 

Кэнники биир ыйы быһа кыайбатах дьыалаҥ бэйэтэ хамсаан, сыҕарыйан барыа. Эн дьыалаҕын-куолугун мэһэйдээн, туорайдаһан сылдьыбыт киһи былаанын-соругун уларытыа. Үчүгэй сонуннары истиэҕиҥ. Кэннигин эргиллибэккэ, саҥа былааны оҥостон, көмөлөһөөччүлэри булан баран, инниҥ диэки күрдьэн бара тур. Өрөбүллэргэ өр көрбөтөх доҕотторгун көрсөн сынньан. Онно улахан болҕомто үөһүгэр киирэр, “сулус” буолар чинчилээххин.

Хахай

Аһара амбициялаах кэллиэгэлэргин сырса сатаама, аргыый наллаан буол. Бэйэҕин ойоҕоскуттан одуулаан көр: хайдаххыный? Уопсастыбаннай олоххо үөскээбит уустук балаһыанньаттан тахсыаҥ. Нэдиэлэ бүтүүтэ болҕомтоҕун дьиэ кэргэҥҥэр туһаай. Таптал боппуруоһугар наһаа “романтичнайгын”, өс киирбэххин. Улахан суолталаах боппуруос быһаарыытын өрөбүллэргэ диэри тохтотон эр, ыксаама. Оччоҕуна эрэ табыллыаҥ.

Кыыс 

Үчүгэй  нэдиэлэ күүтэр. Ханнык эрэ тойон-хотун эйигин дьэ өйдөөн көрөн сыаналыа, чугас дьонуҥ хайгыахтара. Дьон сүбэтин иһит: дьону кытта тапсан үлэлиириҥ түмүгэр наһаа улаханы ситиһиэҥ. Нэдиэлэ бүтүүтэ дипломат буол, ньуолбардаа. Ким эрэ бэйэтин эбээһинэһин эйиэхэ көлбөрүтэ, сүктэрэ сатыыр. Өрөбүллэргэ күүс-уох, сэниэ бөҕө киириэ. Тус олоҕуҥ -- ааттаах. “Романтикалаах” көрсүһүүгэ тиийэн суланыма, салгытыма.

Ыйааһын
 

Сүрэҕиҥ тугу этэрин иһит, саарбах дьыалаҕа кыттыһыма. Үлэҕэр туох да иирсээҥҥэ кыбыллыбакка эбээһинэскин толор. Кинигэтэ аах, сайыннарар куурустарга сырыт, ол кэлин туһалаах буолуо. Таптал боппуруоһугар олус уопутуран, билсии-көрсүү, сыһыан араас барыйааннарын, албастарын тобула сатыыгын. Ол эрээри, таптал дьыалатыгар табыллыы өрөбүллэргэ эрэ күлүм аллайыа. Нэдиэлэ ортотугар эрэйдэнимэ да – туһа суох.

Скорпион 

Эйиэхэ “кыайтарбат, кыаллыбат” диэн туох да суох. Урут бүппэтэх дьылалары барытын биирдэ үмүрү тутуоххун баҕараҕын. Урут бэйэҕэр ылыммыт, атын дьоҥҥо эрэннэрбит эбээһинэстэргиттэн босхолон. Айака, сөп буолуо. Онто да суох, бииртэн биир саҥа, интэриэһинэй этиилэр киирэ туруохтара. Өрөбүллэргэ наһаа элбэҕи үлэлээмэ, хамсаныма. Тапталга табыллыы күүтэр эрээри, онно бокуойуҥ суох буолуо.

Охчут 

Үлэҕэр да, дьиэҕэр да туох да кыайтарбат. Барыта аһара чуҥкук уонна сылаалаах. Туһата суох куолуга, лахсыырга кыттыспатаххына, үлэҥ бэйэтэ аа-дьуо баран иһиэ. Ол эрээри, дьиэҕэр атаарбыт бириэмэҥ кэм арыый сэргэх буолуо, чугас дьоҥҥун көрсөн санааҥ көтөҕүллүө. Соторутааҕыта билсибит киһигэр “мэлдьи, үйэм тухары таптыам” диэн эрэннэримэ. Ол көстөн турар сымыйа буолуо.

Чубуку 

Хайдах суһал, түргэн быһаарыылары ылынарга атыттарга “маастар-кылааһы” көрдөр. Ол эрээри, салалтаны кытта бэрт былдьаһыма. Тылгын, уопсайынан, кыатана тутун. Нэдиэлэ бүтүүтэ хантан эрэ харчы көстүөн сөп. Айаҥҥа турунарга бэртээхэй кэм. Биир да күн айаннаабытыҥ настарыанньаҕын тупсарыа. Бу нэдиэлэ -- таптал дьыалатыгар аһара барсар кэм. Туохтан да долгуйбакка, кыһаллыбакка түһүнэн кэбис.

Күрүлгэн 

Үтүө настарыанньа, бэйэҕэр эрэл төннөн кэлиэ. Элбэх дьону кытта алтыһыылаах, кэпсэтиилээх дьыаланан дьарыктанарга бэлэмҥин. Үлэҕэр сахсаан, түрүлүөн бөҕө. Ону хайдах эмэ гынан хонтуруоллуу сатаа. Өрөбүл – интэриэһинэй дьону кытта көрсөргө үчүгэй кэм. Ким эрэ эйигин онно-манна барарга, тугу эрэ гынарга кучуйа-көҕүтэ сатыыр. Ону быһаччы ыйыт, киниэхэ туох нааданый? Ким эрэ эйиэхэ ымсыырар, күнүүлүүр.

Балыктар 

Олох үүт-тураан, холкутук устар, онон хонтуруоллуурга кыах толору баар. Бэйэҥ тус интэриэскэр бириэмэни була сатаа. Салгыы сайдар, үөрэнэр кыахтары тургутан көр. Өрөбүллэргэ доҕоттору кытта ситиһиилээх көрсүһүүлэр күүтэллэр. Тапталга сыһыан – уу-нуһараҥ, холку. Сулумах балыктар ханнык эрэ ыраах тропик арыыларыгар тапталлаахтарын кытта барыахтарын ыраланаллар.

  

Тарҕат:

Санааҕын суруй