Сылларынан гороскуоп
Илиҥҥи гороскуобунан, 2023 сыл бэлиэтэ – уу хара куруолуга. Үүт-маас маннык куруолук 1903 уонна 1963 сылларга кэлэн ааспыт. Быйыл тохсунньу 22 күнэ үүнэр түүнүттэн саҕаланар.
Куруолук – төрүөҕүгэр, ыччатыгар олус кыһамньылаах, эйэҕэс, дьиэмсэх кыыл. Кытай 12 сыллаах эргииригэр Куруолук сыла муҥутуур дьоллоох диэн ааҕыллар эбит. Астрологтар кэлэр сылы үтүөнү түстүө, туһугар холку, улахан күүгээн, иирсээн суох буолуо диэн сабаҕалыыллар. Куруолук быһаарыныылаах, талааннаах, кырдьыгы өрө тутар. Инникини өтө көрөр дьоҕура балачча сайдыбыт. Онон кини курдук хаачыстыбалаахтар эһиил биллэ ситиһиилэниэхтэрэ.
Куруолук – дипломат. Уопсай тылы кэбэҕэстик булар сатабылынан, дьон икки ардыгар сыһыан тупсарыгар, бүтүн аан дойдуга бэрээдэк олохтоноругар көмөлөһүөҕэ диэн уоскуппуттар.
Ол гынан баран барыта арыынан соппут курдук ньылҕаархай, санаа хоту салаллыа диир кыаллыбат. Ол курдук, икки атахтааҕы тургутан көрөр кэриэтэ сир хамсааһына, цунами курдук айылҕа алдьатыылаах күүстэрэ бэлиэтэниэхтэрин сөп. Сорохтор хамсык дьаҥын саҥа көрүҥэ күөрэйиэ диэн сэрэхэдийэллэр.
Ханнык бэлиэлээх сылга төрөөбүппүтүнэн, Куруолук сыла хайдах ааһыаҕын, туохха болҕойуохха наадатын мантан аллара сиһилии билсиэҕиҥ.
Кутуйах
Кэлэр сыл Кутуйах бэлиэлээхтэр олохторун тосту уларытар эбэтэр биллэ тупсарар кыахтаныахтара. Ол эбэтэр итиннэ карьера тупсуута, үлэни, дьарыгы уларытыы, үп-харчы өттүнэн тупсуу, саҥа дьиэлэнии, таптыыр киһини кытта көрсүһүү, араас хайысхалаах ситиһии да киириэн сөп. Сулустар эһиэхэ саамай сүрүнэ үлэни уонна сынньалаҥы табыгастаахтык дьүөрэлии үөрэнэргэ уонна доруобуйаҕытыгар болҕомтолоох буоларга сүбэлииллэр. Эһиил ыал буолбут Кутуйахтары бигэ туруктаах, уһун дьоллоох олох күүтэр. Оҕолонорго да табыгастаах сыл.
Оҕус
Кэлэр сыл Оҕус обургу бэйэтин күүһүн-күдэҕин олоххо сатаан туһанар, атыттартан биллэ чорбойор кыаҕа улаатар. Идэлэригэр дьиҥ талааннаах, бэриниилээх өттүлэрэ тустаах эйгэлэригэр сөптөөхтүк сыаналанан, хапытаал оҥостор, бэйэ дьыалатын арынар кыахтара улахан.
Ол да буоллар олус быһымахтык быһыыланартан, быстах санаанан салайтарартан туттунуохха наада. Бэл, биир санаалаахтаргытын, өйөөччүлэргитин тэйитэр кутталлааххыт. Куһаҕана суох дохуоту тэбэн биэрэр эбии үлэ көстүөх курдук. Уопсайынан, эһигини таһаарыылаах, холку сыл күүтэр. Доруобуйа улаханнык айгыраабатын курдук, эрдэттэн көрүнэ, эмтэнэ сылдьыҥ.
Баабыр
Бу иннинэ кыайан олоххо киллэрбэккэ сылдьар былааҥҥыт туолар чинчитэ улахан. Онуоха ордук хос кыһамньы, үп да ирдэниэ суоҕа. Баһылыыр-көһүлүүр, инники күөҥҥэ сылдьар хаачыстыбаҕыт, дьону көҕүлүүр сатабылгыт күүһүрэн, саҥа дьыалаҕа ылсар кыаххыт улахан.
Кэлэр сыл эһиэхэ элбэх үчүгэй уларыйыыны аҕалыыһы: ол иһигэр карьераҕа, үөрэххэ, үлэ да өттүгэр буолуон сөп. Арай сыл саҕаланыыта иирсээн, өйдөспөт буолуу, харчыны сүтэрии, эчэйэр куттала баарынан, хара ааныттан сэрэхтээх уонна болҕомтолоох буолуу мэһэйдиэ суоҕа.
Куруолук (Куоска)
Бэйэтин сылыгар куруолук баҕа санаата хаһааҥҥытааҕар да туолар. Тус олоххо да буоллун, үп эйгэтигэр, карьераҕа сыһыаннаах өттө да буоллун, тугу толкуйдаабытыҥ барыта табыллыа. Үгүстэр дьиэ ис бараанын уларытар, интерьери саҥардар туһунан толкуйдуохтара, ону олоххо киллэрэр кыах балай эмэ бэриллиэ. Чуолаан дьиэ кэргэн уонна дьиэ-уот өттө хаһааҥҥытааҕар да инники күөҥҥэ тахсыа, ыал дьон, уу нуурал олохтонуоххут.
Сулумахтар сүрэхтэрин аҥаарын көрсөр кыахтара биллэ улаатыа. Сүрүнэ, бүтүн сыл устата доруобуйаны, туругу көрүнэ сылдьарга сүбэлээбиттэр.
Луо
Сулустаах чааскыт үүнэр сыла иһэр. Онуоха уохтаах-төлөннөөх быһыыгытын арыый да аҕырымнатаргыт, олоххут сүнньүн хаттаан көрүнэргит наада буолуоҕа. Эһигини атахтыыр ол-бу мэһэйи-туорайы баар да буоллаҕына, ону туоратар ухханыгар ис кыаххыт, күүскүт таһыччы эбитин билэн, бэйэҕит да соһуйуоххут. Былааны-соругу олоххо киллэрэр инниттэн бастакы хардыыны бэйэҕит оҥоруоххутун наада. Оннук көҕүлүүр, саҕалыыр түгэҥҥитигэр үчүгэй дуоһунастанар эбэтэр биисинэс арынар, ону тэҥэ айымньылаах суол аартыгар үктэнэр кыаххыт улахан.
Быыһыгар холкутуйары эмиэ сатыахха наада. Уһуннук күүрүүттэн, ыгылыйыыттан, утуйбат буолар, истириэстиир, настарыанньа түһэр-тахсар кыһалҕата күөрэйимиэн наада.
Моҕой
Моҕойдор тэрийэр-бэрийэр уонна элбэх дьоннуун алтыһыылаах биисинэскэ ордук табыллыахтара. Уопсайынан, алтыһар дьоҥҥутун сөпкө таллаххытына, быыс-хайаҕас булан, бүөмнээн олоро, тыын ыла түһэр кэми булуннаххытына, атын дьон кыһалҕатын быһаарыыга батыллан хаалбатаххытына, кэлэр сылы улаханнык сыраласпакка да, этэҥҥэ туораан, Куруолук сылын кимнээҕэр холкутук атаарыаххыт. Эһиил үлэни уларыппат ордук. Үп-харчы чааһа куһаҕана суох буолсу. Чуолаан эбээһинэскитин, үлэҕитин элбэтэр түгэҥҥитигэр ол ордук кыаллыа.
Сулумах Моҕойдору элбэх билсиһии күүтэр. Ол гынан баран ыал буолуохха диэри истиҥ, олохтоох сыһыан олохсуйуута көстүбэт курдук.
Сылгы
Карьера оҥосторго табыгастаах сылгыт иһэр. Туруу үлэһит уонна ылыммыт соругу толорон тэйэр уонна инбэстииссийэни үөрэтэн, табыгастааҕын таба тайаннаххытына, бэйэ дьыалатын да арынар кыах суох буолбатах. Сулумахтарга ыал буолар тоҕоос эмиэ көстөр. Ол гынан баран тапталы инники күөҥҥэ тутар үгэстээххит быһыытынан, карьера үрдүүрүгэр мэһэйдэппэт гына, толкуйдаан, күүһү-кыаҕы сөпкө аттаран туттарга кыһаныҥ.
Куруолук сылыгар холбоспут дьон, уһуннук бииргэ олорор уонна сыралаах үлэ да кэскиллээх, инникилээх буоларын туһугар кыра да кыыһырсыыны, өйдөспөт буолууну таһаарбат буола сатааҥ. Сынньана түһэр наадатын эмиэ умнумаҥ. Айан-сырыы, дьоннуун алтыһыы туһата үгүс буолуо.
Бараан (Коза)
Хааччаҕы билиммэт, кэрэни, сырдыгы оҥорон, ыраланар ис кыаххытын кэлэр сылга харыстаабакка туһаныҥ. Онтугут соло, дуоһунас улаатарыгар, дьиэ-уот оҥосторгутугар көмөлөһүө. Ону таһынан тылгытыгар-өскүтүгэр, тас көстүүгүтүгэр эмиэ болҕойуҥ, үлэлэһиҥ.
Астыктык, тото-хана аһыыр баҕа улаатыыһы. Оттон ол уойууга эрэ тиэрдибэтин, доруобуйа туругар эмиэ охсуон сөбүн умнубаккыт ордук. Онон, сулустар сөпкө аһыыры, утуйар эрэсиими тутуһары, дуоһуйар үлэнэн дьарыктанары сүбэлииллэр.
Эбисийээнэ
Үөрэҕи-билиини кэбэҕэстик ылымтыа, туруоруммут сыалларын толорон тэйэр Эбисийээнэ бэлиэлээхтэр, идэҕэ таһымҥытын үрдэтэр, үбү-харчыны булунар кыаххыт улаатар сыла үүнээри турар. Саҥа сатабылы, билиини-көрүүнү ыларга дьулуһуҥ. Бэйэ күүһүгэр эрэниигит, күүстээх санааҕыт үп-харчы туруктаах буолуутугар, карьераны үрдэтэргэ көмөлөһүө.
Кытаатан майгы-сигили өттүн тупсарыныҥ, муораны тобугунан, халлааны хабарҕатынан буолартан туттунуҥ. Сулумах буоллаххытына, чугастык ылынар, туора дьон санаатыттан тутулуктаммат эрэллээх доҕору булунар кыах улахан. Эһиэхэ бастыҥ сынньалаҥ – дьарыккытын уларытыы, ол иһин үлэни кытта айаны дьүөрэлээн, араас экскурсияҕа сылдьа сатааҥ.
Бөтүүк
Соло, дуоһунас үрдээһинэ эһигини харса-хабыра суох буоларга, бэйэҕитигэр эрэллээх буоларгытыгар көмөлөһүө. Ол гынан баран сыл былаһын тухары тус бэйэ эрэ интэриэһин өрө тутартан туттунуоххутун наада, оччотугар эрэ араас иирсээн, мөккүөр күөрэйиэ суоҕа. Эһиги биллэр-көстөр ухханыгар үбү-харчыны үлүбүөй матайдаан, бэйэҕитин эрэ буолбакка, чугас дьоҥҥутун кэлтэгэй кэппиэйкэтэ суох хаалларбат гына, өйдөөн-төйдөөн дьаһаныҥ. Ороскуоту ааҕына-суоттана үөрэниҥ.
Дуоспуруннаах уонна үйэлээх сыһыаны баҕарар буоллаххытына, күүһү-күдэҕи, баар бириэмэни дьиэ кэргэн туһатыгар аныыргытын көрдөрүҥ. Бэйэмсэх буолумаҥ. Доруобуйаҕытын, аһыыр аскыт хаачыстыбатын көрүнэ сылдьыҥ.
Ыт
Эһиги эмиэ лиидэр хаачыстыбалаах эрэ буолларгыт, саҥа дуоһунастанар биитэр бэйэ дьыалатын саҕалыыр кыаҕы Куруолук харыстаабакка хадаҕалыыһы. Бигэ эрэллээх, бүгүрү үлэһит буолаҥҥыт тэрийэр-бэрийэр талааҥҥыт күүһүрэн, туруоруммут сыалгытын ситэр кыаххыт улааппыт. Дьиэ кэргэҥҥитин кытта кыалларынан бииргэ буолан, ил-эйэ олохсуйарыгар кыһаныҥ. Аймахтан-урууттан тэйэн хаалымаҥ. Таптал иэйиитин чиҥэтэр, бөҕөргөтөр наада түгэнигэр, эрэллээх, кырдьыгынан сылдьар, эппиэтинэстээх буоларгыт наада. Соҕотохсуйбут дьон, субу чугас баар дьоҥҥут ортотуттан тапталлааххытын булунар кыахтааххыт. Ийэ, аҕа буолар дьол да ыраахтан буолуо суоҕа. Кэмигэр сынньанар наада, сөпкө аһыы, таҥна сылдьыҥ.
Сибиинньэ
Ситиһии сиэтиилээх бэртээхэй сыл иһэр. Сүрүнэ – барыта үчүгэй буоларыгар уонна бэйэ элбэҕи ситиһэр кыахтааҕар күүстээх эрэл. Бэйэҕит баҕарар буоллаххытына, үлэни уларытарга тоҕоостоох түгэн балай да буолсу. Атыттартан олус элбэҕи ирдээбэккэ, тулуурдаах буоларгыт карьераҕыт тупсарыгар көмөлөһүө. Үп-харчы өттүнэн кыһалҕа көстүбэт, туруктаах буоларга улаханнык тиритэр-хорутар да ирдэммэт курдук. Ол гынан баран сэрэхтээх буолуу мэһэйдээбэт: киһини барытын итэҕэйэн иһимэҥ. Олус сэрэхтээх уонна ураты дьыалаҕа ылсыбаккыт ордук. Иэйии, таптал абылаҥар ылларар, атыҥҥа аралдьыйар куттал баар, эрэллээх буолуҥ. Олохтон толору астынар түгэҥҥитигэр, оҕолонор туһунан толкуйдаатаххытына, сыыстарыаххыт суоҕа.
Олоҕурбут үгэһинэн, илиҥҥи гороскуоп Куруолук сылыгар анаабыт сибикитин эридьиэстээтибит. Оттон сахаларга эһиил Дьөһөгөй Айыы сыла буоларын билэр инигит?
Эһиил – Дьөһөгөй Айыы сыла
Санатар буоллахха, Дьөһөгөй Айыы — сылгы таҥарата. Кини үһүс халлааҥҥа олорор. Икки атахтаахха бүгүрү үлэһит буолууну, үлэлиир дьоҕуру, дьиҥ хаһаайынныы сатабылын биэрэр. Хаһаайын диэн – бэйэ бас билэр күрүөлэниитэ-хаһааланыыта, дьиэлэнии-уоттаныы, сүөһүлэнии, сылгыланыы.
Дьөһөгөй Айыы ыйыгар төрөөбүт дьон биһиктэрэ Таҥха онус оронугар олорор диэн буолар. Кинилэр аһаҕас, сайаҕас майгылаахтар, алгыстаах тыллаахтар уонна олоҕу-дьаһаҕы сатаан тэринэр дьоҕурдаахтар.
Саханы саха дэппит, түөрт түөрэм туйахтаах сылгы таҥарата Дьөһөгөй Айыы барахсан, этэргэ дылы, сыһыы-сыһыы муҥунан сыспай сиэллээҕи сырыырҕатар, төрөтөр оҕону төлкөлүүр, сылгы куттаах саха дьонун сылаас хараҕынан көрүө, араҥаччылыа, харыстыа диэн эрэниэҕиҥ. Барыта этэҥҥэ буолуохтун!
Сулустар сипсиһиилэрин сэргэҕэлээн истэн сурунна ЛОҺУУРА.
Хаартыска: https://fanibani.ru:
