Хой
Нэдиэлэ бастакы аҥаарыгар бэйэҥ тускунан тарҕанар сурахтарга болҕомтолоохтук сыһыаннас. Бэрдэ суох тыл-өс “күүлэйдии” сылдьар буолуон сөп. Ол сурахтары ким тарҕатарын быһаарса, хобу-сиби дириҥэтэ сатаама. Суолга сэрэхтээх буол.
Нэдиэлэ иккис аҥаара духуобунаһы өрө тутар дьоҥҥо сэргэхтик ааһыа. Өрөбүллэргэ арыгыны уонна араас эми-тому иһимэ, сүһүрүөххүн сөп.
Оҕус
Нэдиэлэ саҥатыгар көрдөөх-нардаах, астаах-үөллээх бырааһынньыктарга сылдьыма. Таах туһата суохха харчыгын эрэ матайдыаҥ. Ырааҕы былааннаныма, ол син биир туолуо суоҕа.
Нэдиэлэ иккис аҥаарыгар доҕордуу, партнердуу сыһыан тупсуо. Кэргэҥҥин, таптыыр киһигин эбэтэр дьыалабыай патрнергун кытта уустук, мөккүөрдээх боппуруоһу быһаарыаххыт. Ыал буолааччыларга табыгастаах кэм.
Игирэлэр
Аһара өрүкүйэр, омуннурар табыллыбат. Уустук, мунаах балаһыанньаны көрүстэххинэ – өрө баран иһимэ. Тулуйан күүт. Ити үрдүкү салалтаҕыҥ эбэтэр былаастаах дьону кытта алтыһыыга сыһыаннаах сүбэ.
Оттон нэдиэлэ иккис аҥаарыгар мэһэй барыта төлө барыа: түһүнэн кэбис. Ситиһии-кыайыы өр күүттэриэ суоҕа. Табаҕы-арыгыны, о.д.а. куһаҕан дьаллыгы быраҕарга, туһалаах дьыаланы баһылыырга табыгастаах кэм.
Араак
Нэдиэлэ бастакы аҥаарыгар ыраах айаҥҥа барыма. Өскөтүн айаҥҥа сылдьар буоллаххына, былааннаммыт маршруккун уларытыма, суол быраабылатын кэһимэ. Уопсайынан, суолтан сэрэн.
Нэдиэлэ иккис аҥаарыгар истиҥ иэйии уонна дьиэ кэргэн эйгэтигэр ситиһии күүтэр. Эрэллээх буолуу, эппиэтинэс диэни толору сыаналыаҥ. Оҕолордоох буоллаххына, иитиигэ болҕомтоҕун туһаай, туһалаах буолуо.
Хахай
Тугу эрэ бас-баттах быһыыланыаххын, “хорсун быһыыны” оҥоруоххун баҕараҕын да, туттуна сатаа. Эчэйиэххин сөп. Нэдиэлэ саҥатыгар туох да “экстримҥэ” киирбэккэ, дьиэҕэр олорбутуҥ ордук буолуо.
Нэдиэлэ иккис аҥаарыгар дьиэҕин-уоккун өрө тарт, сууй-сот, улахан убуорканы оҥор. Нэһилиэстибэ боппуруоһун быһаарыс, аҕа саастаах аймахтары кытта атах тэпсэн олорон кэпсэт. Сүһүрүүттэн сэрэн.
Кыыс
Нэдиэлэ бастакы аҥаарыгар кэргэҥҥин кытта уустук боппуруостары ырытыһыма. Бэрт кыраттан саҕаламмыт сыыһа өйдөһүү күтүр улахан иирсээҥҥэ тиэрдэр кутталлаах. Онно киирэн биэрбэт туһугар кыһан, бэйэ бодоҕун тардын.
Нэдиэлэ иккис аҥаарыгар иирсээн уҕарыа. Уҕараабытын ааһан, аһара тупсан, сымнаан кэлиэ. Эйигин үөрүүлээх бэлэх күүтэр. Сынньалаҥ кулууптарыгар, бэһиэлэй тэрээһиннэргэ сылдьарга үчүгэй кэм.
Ыйааһын
Нэдиэлэ бастакы аҥаарыгар доруобуйаҕын көрүн. Наһаа элбэҕи аһаама – иһиҥ-үөһүҥ ыалдьыа, аһара уойуоҥ. Улахан, киэҥ кэскиллээх үлэни толорор кыаҕыҥ суох курдук. Тугу барытын оҥорон көрөҕүн да, онтон тугун да тиһэҕэр тиэрдибэккин.
Ити чааһыгар нэдиэлэ иккис аҥаара быдан ордук буолуо. Бу кэмҥэ төһө баҕарар уустук соругу толорор кыахтаныаҥ. Ити ордук дьиэ ис-тас үлэтигэр сыһыаннаах.
Скорпион
Таптыыр буоллаххына, нэдиэлэ бастакы аҥаарыгар ураты болҕомтолоох, тулуурдаах буол. Таптыыр киһигиттэн олус элбэҕи эрэйимэ, эрэйдээмэ. Оҕолоох буоллаххына, аһара атаахтатыма. Оҕоҥ наһаа элбэҕи хамсанар, мэниктиир, тылгын истибэт. Нэдиэлэ иккис аҥаарыгар таптал уонна оҕо иитиитин боппуруоһа – бары этэҥҥэ быһаарыллыахтара. Айар үлэлээх дьону ситиһии, ыра санаа туолуута күүтэр.
Охчут
Нэдиэлэ бастакы аҥаарыгар дьиэ кэргэн иһигэр бэрт уоттаах-күөстээх иирсээн, “хабыр хапсыһыы” күүтэр. Хайдах эрэ бэйэҕин кыана туттан, тулуйан, ол “быһаарсыыны” нэдиэлэ иккис аҥаарыгар хааллара сатаа. Оччоҕуна мөккүөр бэйэтэ уостан хаалыа. Хамсаабат баайга-дуолга сыһыаннаах докумуоннарга илии баттаама. Ыалдьыттары ыҥырыма.
Үп-харчы боппуруоһун нэдиэлэ иккис аҥаарыгар эрэ быһаар, оччоҕо барыта табыллыа.
Чубуку
Доруобуйаҥ олус мөлтөөн, аһааҕыран сылдьар. Онон ыарыы сыстарыттан сэрэн. Халыҥнык таҥын, сөтөллөр-ытырдар дьонтон ыраах сырыт. Тоҥума. Айанныырга, дьону кытта көрсөргө дьүөрэтэ суох кэм.
Нэдиэлэ иккис аҥаарыттан ол барыта кыаллар буолуо: айан да, дьону кытта көрсүһүү-алтыһыы да... Доҕотторгун кытта көрүс, сынньан. Өйүҥ-санааҥ тобуллубута сүрдээх, онон үлэҕэ-үөрэххэ барытыгар ситиһии эрэ күүтэр.
Күрүлгэн
Болҕомтоҥ барыта үп-харчы боппу-руоһугар түмүллүө. Дьахтар күнүнэн сыаналаах бэлэх ыла охсорго тиэтэйимэ. Бу – көргө-нарга, бэлэх ылыыга барсыбат кэм. Нэдиэлэ бастакы аҥаарыгар кыаммат, харчыта суох эрээри, күндү малы атыылаһыма. Холтуура табаар түбэһиэ.
Уопсайынан, бэлэҕи-атыыны нэдиэлэ иккис аҥаарыгар оҥорбутуҥ ордук буолуо. Үлэҕэр балаһыанньа – бэрт, хамнаскын эбиэхтэрэ, баҕар, бириэмийэ биэриэхтэрэ.
Балыктар
Ис туругуҥ барыта иирсээҥҥэ баҕара-дьулуһа сылдьар. Онон дьиэҥ иһигэр, аймахтаргар өйдөөн-дьүүллээн сыһыаннас, кими да “үөрэтэ” сатаама, мөкү киэпкин кыатана тутун. Туох эрэ өйдөспөт түгэн баар буоллаҕына, баһаалыста, ону нэдиэлэ иккис аҥаарыгар быһаарыс.
Нэдиэлэ иккис аҥаара: былааны олоххо киллэрэргэ, айанныырга, дьону кытта алтыһарга, үөрэнэргэ, интэриниэтинэн билсэргэ-көрсөргө үчүгэй кэм.
Хаартыска: sensatsiya.com
