Киир

Киир

Хой

хой

Күүһүҥ-уоҕуҥ туохха барытыгар тиийиэх курдук. Хаһааҥҥытааҕар да сэниэлээххин, хайа да үлэни үмүрүтэр кыахтааххын. Билигин тус имиджкин оҥосторгор саамай тоҕоостоох кэм. Бэйэҕин уопсастыбаҕа, кэлэктиипкэ табан көрдөрдөххүнэ, ыраахха тиийэр кыахтааххын. Үрдүк ситиһиилэнэргэр туох да мэһэй суох эрээри, дьон тыла сытыы буоларын умнума. “Киһи тыла – ох” диэн мээнэҕэ эппэттэрин өйдөө.

Оҕус

о5ус

Атын дьон кыһалҕатын быһаараргар сыраҥ-сылбаҥ бараныаҕа. Эн үтүө санаалааххын тулалыыр дьонуҥ бэркэ билэллэр уонна туһана сатыыллара эмиэ баар. Эр дьон – табаарыстарын, дьахталлар дьүөгэлэрин кытта алтыһан улаханнык дуоһуйуохтара. Доҕоттору кытта аһаҕастык кэпсэтии үтүө түмүктээх буолуоҕа. Санаалыын чэпчиэҥ, олоххор буола турар уларыйыыларга быдан эрэллээхтик хардыылыырга быһаарыныаҥ.

Игирэлэр

игирэ

Наһаа элбэҕи үлэлиир курдук көстө сатыыгын. Салалтаҕа бэрт буола сатыырыҥ элбээбит, бииргэ үлэлиир дьоҥҥун уган да биэриэххин сөп. Итинтэн сылтаан дьон эйиэхэ сыһыана уларыйан эрэр, үчүгэйдик толкуйдан. Доҕор-атас хампаанньатыгар өрүү солбуллубат лиидэргин, тыл көтөҕөөччү, салайааччы – эн. Өрөбүллэри айылҕаҕа атаарар былааннааххын эрээри, кыратык былааныҥ ыһыллыа. Сулумахтар тапталларын көрсөр кыахтара улахан.

Араак

араак

Үлэҕэ олус эппиэтинэстээх күннэр үүммүттэр. Үгүс Араак үлэҕэ баттатан, тиритии-хорутуу. Эдэрдэр – үөрэххэ, оттон атыттар күүстээх үлэҕэ умса түспүттэр. Бу нэдиэлэ сүрүн үөрүүтэ – хармааныҥ биллэ халыҥыа. Эбии дохуот кутулла турар, онон сыаналаах малы-салы, тэрили атыылаһар табыгастаах. Аҕам саастаах Араактар, доруобуйаҕытын үчүгэйдик хонтуруолланыҥ. Дьаҥ, ыарыы сибикитэ биллээри гыммыт...

Хахай

хахай

“Олоҕуҥ – эн илиигэр” диэн бэргэн этиини умнума. Олус үлэһиккин уонна тобуллаҕас толкуйдааххын. Кэмигэр сөптөөх хардыыны оҥордоххуна, бу сайын тус олоххор уларыйыы-тэлэрийии буолсу. Үгүс Хахай тас дойдуга көһөр туһунан күүскэ санаммыт. Төрөппүттэр, оҕолоргутугар сымнаҕас соҕус буолуҥ, сороҕор наһаа бардамныыгыт. Төрөппүттэргитигэр, бииргэ төрөөбүттэргитигэр эмиэ арыый да сымныыргыт буоллар.

Кыыс

кыыс

Бэйэҕэ эрэл кыра, ол – үлэни, сырыыгын атахтыыр. Айар куттаах Кыргыттар иэйиилэрэ уһуктан эрэр, хамсааһын буолуох курдук. Эти-сиини эрчийэ сылдьарыҥ үчүгэй, күҥҥүн сэрээккэттэн саҕалаа. Харчыгын харыстаа, уурун. Чуумпуга сытан инники олоххун торумнууруҥ, иннигин-кэннигин анаалыстыырыҥ элбээбит. Арааһа, тус олоххор уларыйыыны киллэрээри гыммыккын. Ол эрээри ханнык баҕарар уларыйыы бэйэҕиттэн саҕаланарын умнума.

Ыйааһын

ыйааьын

Үлэҥ өссө таһаарыылаах буоларыгар сатабылгын ситэ туһамматыҥ таҥнары тардар. Күн аайы бэйэҕин дьарыктыыгын, билиигин-көрүүгүн хаҥатаҕын эрээри, профессиональнай уопуккун туһаммаккын. Туохтан да толлубакка, кимэн киирэн ис. Саҥа бырайыагы, дьыаланы саҕалыыргар кыах толору. Эйиэхэ сулустар үрдүк ситиһиини түстүүллэр. Иллэҥ кэмҥэр муусуканы иһит, успуордунан дьарыктан, сөбүлүүр аскын аһаа. Сулумахтарга интэриэс олус күүстээх, тас көрүҥҥүт наһаа тупсубут.

Скорпион

скорпион

Дьэ, сүрдээх үлэһит киһигин. Ытырбыккын ыыппаккынан баҕас маладьыаскын. Ол иһин үгүс үлэ син биир үтүө түмүктээх буолар. Сүрүн үлэҥ таһынан өссө сөбүлүүр дьарыккыттан улаханнык дуоһуйуоҥ. Маны таһынан сүбэҕинэн-амаҕынан чугас доҕоргор сүҥкэн көмө буолуоҥ, эрэллээх доҕор буоларгын өссө төгүл дакаастыаҥ. Олус чараастык таҥныма, доруобуйаҕын көрүнэ сырыт. Тымныйан хаалыаххын сөп, сааскы салгын албын. Тапталлааххын кытта сыһыан өссө истиҥ-иһирэх буолбут.

Охчут

охчут

Күннээҕи олоххор кинигэ ааҕар интэриэскин күүһүрдүөххүн наада. Эбии үөрэхтэртэн, лиэксийэлэртэн, маастар-кылаастартан аккаастаныма. Билэ-көрө сатыыр дьоҕургун ыһыктан кэбиһимэ. Эн тускунан үчүгэй санаалаахтар. Онон кэллиэгэлэриҥ, доҕотторуҥ ортолоругар убаастабылы ылаҕын. Улахан кыһалҕа суох эрээри, үп-харчы тиийбэт. Кэлиҥҥинэн хамнас киирэрэ мөлтөөбүт. Онон харчыгын былааннаан туттарыҥ ордук, чугас дьоҥҥор олус сыаналаах бэлэҕи оҥорботуҥ ордук.

Чубуку

чубуку

Билигин дьиэни-уоту оҥосторго, ис тутулун тупсарарга, өрөмүөннүүргэ бэрт күннэр. Туох баар харчыгын дьиэ-уот үлэтигэр ыытыаҕыҥ. Бу нэдиэлэҕэ айылҕалыын алтыһыы элбэх буолуоҕа, тыаҕа тахса турар идэлэммиккин. Хаһааҥҥытааҕар да санаалыын чэпчээн, ыраастанан сылдьар курдуккун. Санаа-оноо буулаабыт. Сулумахтар эрэллээх доҕордорун көрсөн, хаһааҥҥытааҕар да сүрэхтэрэ уоскуйан сылдьар. Ыаллар сыһыаннара эмиэ истиҥ, ыраас...

Күрүлгэн

курулгэн

Олоҕуҥ сөптөөх суолунан баран иһэр. Кыралаан уларыйыы тахсар. Эн көмөҕөр наадыйар дьоҥҥо хаһан да аккаастаама. Кытаатан үтүө санаалаах буол. Эр дьон, тапталлааххытыгар үчүгэй сыһыаҥҥыт наада. Ардыгар холус сыһыаҥҥытынан кэрэ аҥааргытын соһутаҕыт. Билигин тахсар уларыйыылары чэпчэкитик ылыннаххытына, барыта этэҥҥэ буолуоҕа. Дьиэ кэргэн сыһыана инники миэстэҕэ сылдьарын ханнык да түгэҥҥэ умнума. Үлэҕэ, карьераҕа олус охтоҕун.

Балыктар

балыктар

Эйигин үчүгэйдик билбэт дьон, сымнаҕас майгылаах дии саныыллар. Ол иһин хайдах баҕарбыттарынан салайыахтарын, үлэни найылыы сатыахтарын сөп. Ол кыаллыа суоҕа. Тоҕо диэтэххэ, кытаанах майгыгын көрдөрөн, сиэрэ суох быһыыны үөскэппэккин. Бу күннэргэ үлэнэн эрэ олоруоҥ эрээри, дьиэҕэ-уокка эмиэ төһө кыалларынан кыһаллыаҥ. Оҕолоруҥ ситиһиилэрэ кынаттыа, үөрүүгүн үксэтиэ. Аҕам саастаах Балыктарга ыарыы сибикитэ биллиэх курдук, онон быраас көмөтө наада.

Тарҕат:

Сэҥээриилэр

Степан Макаров
+1 Степан Макаров 11.04.2021 10:18
То5о нэдиэлэ аайы таххыбат буолла гороскоп
Ответить

Санааҕын суруй