Индиана Феофанова
-
-
БОСТУУК УОЛАН ЫРЫАТА
Саһарҕалыын куотуһа
Сайдыыр саҥа иһиллэр,
Сарсыардаттан эрдэлээн
Сайылыкка ыам күүтэр.
Маҥан, ыраас былааттаах
Мааны, кэрэ кыргыттар
Мичилиһэр мичээрдээх
Миигин күүтэр курдуктар.
Маҥаачыйам барахсан
Маарыйабын санатар,
Матаҕаркаан синньитэ
Манньытаахтыы ыанньыйар.
Күлүм күннээх Туоһахта
Күннэй курдук унаархай,
Күнүүлүөхпүн күүтэрдии
Күрүҥ өҥнүүн тунаархай.
Ураанньыкпын эрэлбин
Уураан ылыам бүөбэйбин,
Уурбут-туппут таһаалаах
Уһун Уокка сэгэрбин.
Маннык талба көстүүттэн
Майгым кытта тупсаахтыыр,
Маныы-кэтии сылдьаммын
Маппат санаа кыымнаахтыыр.
Саһарҕалыын куотуһа
Сайдыыр саҥа иһиллэр,
Сарсыардаттан эрдэлээн
Сайылыкка ыам күүтэр.
Сэҥээриилэр