Павлова Мария Петровна

Сахабыт саадьаҕай ынаҕа —
Өбүгэ сиэдэрэй бэлэҕэ.
Сүүһүнэн сыллары уҥуордаан,
Саханы сахабын дэттэҕэ.

Томороон тымныыны тулуйан
Кыһарҕан кэмнэри биллэҕэ...
Чэрдийбит илиилээх төрүппүт
Бүөбэйдээн, баччаҕа кэллэҕэ.

Сахабыт ынаҕа барахсан
Сахалыы сайаҕас майгылаах.
Эмис эт, үүт-сүөгэй илгэлээх,
Куруутун ичигэс эркиннээх.

... Айылҕа маанылаан айбыта,
Алмаас таас кэриэтэ кырыылаан.
Эстибэт-быстыбат дьылҕалаан,
Бар дьонун абырыыр аналлаан.

Сахабыт ынаҕын иитэммит
Уйгулаах олоҕу түстүөххэ.
Төрүппүт тэниппит үгэһин
Кэнчээри ыччакка тиэрдиэххэ.

Чурапчы.