Пелагея Игнатьева - Намыына

Таптыыра ийэккэм биэбэйин
Туоһахталаах төрүт утумун,
Тиэрбэс курдук хап-харанан
Тэрбэччи көрбүт бэйэтин.

Маталдьыйар-ханалдьыйар,
Матаҕа курдук толору,
Майгыннаах эрэ бастыҥа,
Мааны үүттээх биэбэйэ,
Кылгас бээгэй саха ынаҕа.

Сайыы уутун уулаан,
Сииктээх алааска мэччийэн,
Синньэ ыанньыйа тиргиллэн
Сыдьааннарын субурутан,
Бу лоҥкунатан кэлэрэ.

Түстэ буруотун умсугуйа
Тохтоон сынньана сытара,
Дөрүн-Дөрүн буһурҕаан
Кэбинэн кэрдиргэтэрэ.

Кыстыкка кэмчи да окко
Кыстыыра сирбэккэ-талбакка.
Тымныы тыал чаҕыппата,
Далга аһыыта саас эрдэ.

Күһүн былдьаһыкка идэһэ
Мааны сахам сүөһүтэ
Кэһии этэ минньигэһэ,
Манньытар амсайбыты.

Саханы саха дэппит
Уйгуну-быйаҥы тэниппит,
Улуу омуктарга  аатырбыт,
Дьиҥнээх сахам ынаҕа.

Сыдьааннара билигин,
Санаталлар ааспыты,
Ийэкээм итиэхтээбит
Истиҥ сахам ынаҕын.