Сабыйа

Саха ынаҕар махталым

Саха ыал буруотун унаардан,
Олоҕун тускутун уһатан,
Мылахсын Айыыһыт маанылаан
Ынаҕы түһэрбит арчылаан.

Күөх тыаллаах сайылык хотуна —
Ыанньыйан,куталлан-маталлан,
Ыраахтан лаҥкыныыр маҥыраан,
Иччитин ыҥыран,ыксатан...

Үрүҥү-хараны дэлэтэн,
Үллэмэй күөрчэх дэбилитэн,
Иитиллэр тыынньабыт бастыҥа,
Байылыат олохпут кут тыына!

Ыыраахтаах туйахтаах барахсан
Саханы эмсэхтээн ииппитэ,
Быстыбат уһун тыын биэрбитэ —
Махталбыт тиийиэхтин ананан!

Тусаһа тулата тигинээн,
Уйгулаах тэлгэһэ киэҥинэн
Ааллаатын сүөһүбүт үөрүнэн,
Төлкөлөөн төрөөтүн үөрүүнэн!

Сайылык түптэтэ дыргыйан
Халлааҥҥа харбаһа тыргыйан,
Дьиҥ саха сүөһүтүн
мунньуохтун —
Үүттүгэн ынахпыт удьуорун!

31.03.2021.