Ил Дархан Айсен Николаев "СӨ Норуодунай учуутала" үрдүк ааты авторскай бырагырааманан үөрэтэр Тэхэниичэскэй лиссиэй дириэктэригэр, Нина Афанасьевна Алексееваҕа анаата.
Нина Алексеева аатын өрөспүүбүлүкэҕэ киэҥник билэллэр. Кини үөрэхтээһиҥҥэ саҥалыы сүүрээни киллэрэн, бэйэтэ оҕону үөрэтиигэ инновационнай, динамическэй тиһиги киллэрбитэ. Кини оскуолата 1993 сыллаахха арыллыбыта. Бу оскуолаҕа 11 сыллаах үөрэх бырагырааматын 5-6 сылынан иҥэрэллэр. Бу кэм устатыгар Алексеева оскуолатын 650 оҕо бүтэрдэ, кинилэртэн аҥаардара - кыһыл көмүс мэтээлинэн түмүктээбиттэрэ, 100-тэн тахса оҕо - үрүҥ көмүһүнэн.
Выпускниктар ортолоругар ООН ЮНИСЕФ отделын исписэлииһэ, космическэй ракеталары оҥорор инженер-конструктор, уустук лазер технологиятын кытары үлэлэһэр, авиакосмическэй бырамыысалыннас инженердэрэ, бөдөҥ баан уонна тэрилтэ үлэһиттэрэ , учуонайдар, салайааччылар бааллар.
Соторутааҕыта бу оскуоланы 13 сааһыгар бүтэрбит Богдан Тарасовка, А.Туполев аатынан Казаннааҕы национальнай чинчийэр тэхэниичэскэй университет устудьуонугар, сыл устата Татарстаан бэрэсидьиэнин истипиэндьийэтин төлүүр буолбуттарын туһунан иһитиннэрбиттэрэ.
Нина Афанасьевна Алексеева - Сунтаар улууһун Кулуһуннаах алааһыттан төрүттээх, Саха сирин үтүөлээх учуутала, билимҥэ уонна тиэхиникэҕэ Саха сирин судаарыстыбаннай бириэмийэтин лауреата.
