Афанасий Алексеев кэллиэгэлэригэр, урбаанньыттарга эрдэ ылбыт табаардарыгар сыананы үрдэппэттэрин туһунан көрдөстө. «Японец» маҕаһыын дириэктэрэ бу кириисиһи Саха сирин урбаанньыттарын түмсүүтэ этэҥҥэ, чиэстээхтик аһарыныа диэн эрэл санаатын биллэрдэ.
«...мин иннибэр икки суол баар: доллар бүгүҥҥү куурсун туругунан табаар сыанатын үрдэтии, итинник гынан нэһилиэнньэҕэ онто да суох үөскээбит уустук балаһыанньаны өссө дириҥэтэн биэрии.
Эбэтэр иккис суолу талыы – эрдэ атыылаһыллыбыт табаарга сыананы үрдэппэппит уонна ол ону хойукка диэри тутуһан сылдьыы.
Иккис суол, биллэн туран, саамай уустук: табаары атыылаан баран, поставщиктан ол табаары икки төгүл ыарахан сыанаҕа атыылаһабыт.
Маныаха, биир сүрүн суолталааҕы, бэйэбит барыспыт буолбакка, дьон иннигэр эппиэтинэстээх буолуохтаахпытын өйдүөхтээхпит.
Доҕоттоор, дойдубут уустук кэмигэр хас биирдиибит ханнык суолу таларын бэйэтигэр судургута суох быһаарыныы ылыныахтаах. Быһаарыныы эһиги биисинэскитигэр уустук уонна ыарахаттардаах буолуоҕа, ол эрээри, мин Эһигиттэн туох баар кыаллыан сөптөөҕү дьаһанаргытыгар көрдөһөбүн.
Эрдэ ылбыт табааргыт сыанатын үрдэтимэҥ, кыах баарынан муҥутаан сыана үрдүүрүн тута сатааҥ. Биһиги бары биир эрэ кириисиһи аһардыбатахпыт, онон, бу билиҥҥини даҕаны чиэстээхтик кыайыахпыт», - диэн Афанасий Алексеев суруйар.
