Киир

Киир

СӨ урбаанын, атыыга-эргиэҥҥэ уонна туризмҥа миниистирэ Ирина Высоких Турция делегациятын кытта көрүстэ. Бу туһунан биэдэмистибэ пресс-сулууспата иһитиннэрэр.

Турция уонна Саха сирин урбаанын ассоциациятын бэрэсидьиэнэ Омер Махмудоглу, кини сүбэһитэ Мехмет Дэлэн уонна урбаанньыт Ильяс Кириш бу күннэргэ Саха сиригэр кэлиэхтэрэ.

Бу ассоциация Омер Махмудоглу көҕүлээһининэн бу сыл саҥата Анталия куоракка тэриллибитэ. Ассоциация чилиэннэринэн бөдөҥ туристическай хампаанньалар салайааччылара буолаллар.

Көрсүһүүгэ туризм эйгэтигэр бииргэ үлэлээһин туһунан дьүүллэстилэр. Омер Махмудоглу ТИКА (Тюрк Ишбирлиги Калкынма Ажансы) диэн аһымал түмсүү Саха сиригэр 2,5 мөл доллар суумалаах мэдиссиинэ тэрилин бэлэхтиирин эттэ. Ону таһынан, Дьокуускайга уһуйаан туттарарын кэпсээтэ.

Кини кэпсииринэн ассоциация “Turkish Airlines” дириэктэрдэрин сэбиэтин балаҕан ыйынааҕы мунньаҕар, Дьокуускай – Анталия хайысханан быһа рейси олохтуур  туһунан боппуруоһу көрөллөрүн ситиспит. Ону таһынан, Дьокуускайга “Бешикташ” диэн турецкай футбольнай кулууп филиалын арыйарга, идэлээх тренердэри ыытан үлэлэтэргэ  бэлэмнэрин эттэ.

Саха ырыатын-тойугун араадьыйанан таһаарар уонна Саха сирин туһунан киинэ устан YouTube ханаалга көрдөрөр былааннаахтар. Ирина Высоких Турцияҕа киинэ тыйаатырдарыгар саха киинэтин көрдөрүөххэ сөбүн туһунан санаатын эттэ. Оону Омер Махмудоглу өйөөтө уонна турок тылыгар тылбаастыыр үлэни саҕалыырга ыҥырда.

Ону таһынан, ассоциация инники былааннарын билиһиннэрдэ. Ол курдук, Дьокуускайга турецкай аһы билиһиннэрэр тэрээһиннэри ыытар уонна Кемере куоракка Саха сирин болуоссатын тутар туһунан былааннаахтарын кэпсээтэ диэн пресс-сулууспа иһитиннэрэр.

 News.Ykt.Ru

Тарҕат:

Санааҕын суруй