Ахсынньы 14 күнүгэр Мэҥэ Хаҥалас улууһун Даркылаах нэһилиэгэр саҥа биэлсэр-окусуор пуунун үөрүүлээх арыллыыта буолан ааста. Бу туһунан СӨ доруобуйа харыстабылын министиэристибэтин пресс-сулууспата иһитиннэрэр.
Даркылаахха 400 тахса киһи олорор. Олохтоохтор мантан инньэ саҥа пууҥҥа кэккэ анаалыстары туттарар, быһыы ылар уонна да атын мэдиссиинэ өҥөтүнэн туһанар буолуохтара. Ону таһынан, диспансеризацияны барыахтара.
Саҥа пуун федеральнай ирдэбиллэргэ толору эппиэттиир, аныгы тэрилинэн хааччыллыбыт. Манна биэлсэр кэбиниэтэ, көрөр хос уо.д.а. баар.
Быйыл Аллайыаха, Амма, Кэбээйи, Уус Алдан, Алдан уонна Мэҥэ Хаҥалас улуустарыгар алта пуун арылынна. Бу сыл түмүктэниэр диэри Бүлүүгэ уонна Ленскэй оройуонугар үс пуун үлэҕэ киирэрэ былааннанар.
Оттон 2020 сылга 11 эбийиэк тутуллара былааннанар. Олортон сэттэтэ биэлсэр-окусуор пууна уонна түөрт амбулатория буолар. Ол курдук, Жиганскай, Нерюнгри, Үөһээ Бүлүү, Томпо, Усуйаана, Ньурба, Сунтаар, Хаҥалас, Таатта, Өлүөхүмэ уонна Орто Халыма улуустарыгар (оройуоннарыгар) арыллыахтаахтар. Манна федеральнай бүддьүөттэн 100 мөл солк курдук үп көрүллүөҕэ.
