Булуҥ улууһугар баар Беннет арыытыгар, Де-Лонг архипелагка Нуучча Георгафическай Уопсастыбатын Саха сиринээҕи салаата уонна Арассыыйа быыһааччыларын Сойууһа Нуучча полярнай эспэдииссийэтин 120 уонна Арассыыйа ЫБММ тэриллибитэ 30 сылларыгар анаан улахан эспэдииссэйини былаанныыллар.
Де Лонг арыытын эмиэрикэлэр эспэдииссийэлэрэ арыйбыта, онуоха эспэдииссийэ чилиэттэрин аҥардара саахалланан суорума суолламмыттар. Билигин бу арыыны АХШ сенатордара “биһиэнэ” диэн былдьаһартан соло буолбаттар. Нуучча георгафическэй уопсастыбата от ыйын бүтүүтүгэр тэрийэр эспэдииссийэтэ бу Арктика кый ыраах арыытыгар тиийэн саха балаҕанын туруоруоҕа, бу балаҕан хонуу стационарын уонна быыһыыр депо оруолун толоруоҕа.
Эспэдииссийэ чилиэттэрэ арыыны сиһилии чинчийиэхтэрэ. Бу арыыга икки атахтаах мээнэ үктэммэтэх, онон билим өттүнэн улахан интэриэһи үөскэтэр. 1980-с сылларга бу арыыны космостан чинчийэн баран, манна вулкан баарын сабаҕалаабыттар. Онон бу арыыга Саха сиригэр суос-соҕотох вулкан баар буолуон сөп. Эспэдииссийэ арыы фаунатын, флоратын эрэ буолбакка, сиһилии ирбэт тоҥу, уу, муус тутулларын, вулканы чинчийиэҕэ уонна урукку эспэдииссийэлэр суолларынан сылдьыахтара. Эспэдииссийэ Дьокуускайтан от ыйын 25 күнүгэр “Кочевник” мотуордаах оҥочоннон хоҥнуоҕа.
Маршруттара: Дьокуускай-Тиксии-Святой нос- Беннет арыыта. Эспэдииссийэ 8 киһилээх: сүрүннээн идэтийбит быыһааччылар, “Полюс холода соединяет океаны” эспэдииссийэ кыттыылаахтара. Эспэдииссийэни биология билимин кандидата, быыһааччылар Арассыыйатааҕы сойууһун Саха сиринээҕи салаатын бэрэссэдээтэлэ, Саха сирин быыһыыр сулууспатын 2010-2019 сс. салайан олорбут Николай Находкин салайыаҕа.
