Дьокуускайга сокуоннайа суохтук үлэлии турбут оонньуур саалаланы тэрийээччилэр тутулуннулар.
ФСБ Саха сиринээҕи салаатын үлэһиттэригэр 3 эр киһи куорат кырыытыгар куортамнаабыт дьиэлэригэр сокуоннайа суохтук сүүйүүлээх оонньуу саалаларын тэрийэн үлэлэтэллэрин туһунан иһитиннэрии киирбит. Бэрэбиэркэ түмүгүнэн 1971 уонна 1972 сыллаах төрүөх Сунтаар улууһуттан сылдьар уонна 1979 сыллаах төрүөх Нам киһитэ тэрийбиттэрэ биллибит. Кинилэр күннэтэ 300 тыһ. солк. саҕалаан 5 мөл. солк. тийэ хамнатар покер оонньуутун тэрийбиттэр. Бассаабынан покер ставкатын, котировкатын, ханна, хаска, хас киһи кыттыылаах оонньуу буоларын туһунан иһитиннэриини ыыталыыллар эбит. Тэрийээччилэр үһүөн тутуллубуттар, икки киһитин СИЗОҕа утаарбыттар, биирдэстэрин ханна да барбатын курдук бэппиискэлээн ыыппыттар. Арассыыйа ХК 171.2 ыст. 3 ч. холуобунай дьыала тэриллибит, бу дьон 6 сылга дылы хааллыахтарын уонна 1 мөл. солк. дылы ыстырааптаныахтарын сөп.
