Бүгүн Национальнай бэчээт күнэ бэлиэтэнэр. 114 сыллааҕыта, от ыйын 1 күнүгэр "Якутский край" уонна "Саха дойдута" хаһыаттар тахсыбыттара. Онтон ыла Саха сиригэр национальнай суруналыыстыка уонна бэчээт сайдан барбыта.
Саха драматургиятын, суруналыыстыкатын, бэчээтин төрүттэспит, биллэр уопсастыбаннай деятель Василий Никифоров - Күлүмнүүр быйыл төрөөбүтэ 155 сылын туолар. Бүгүҥҥү бэлиэ түгэҥҥэ сөп түбэһиннэрэн, Ил Дархан Айсен Николаев, суруналыыстар, дьокутааттар Ил Түмэн дьиэтин иннигэп Күлүмнүүр пааматынньыгар сибэкки дьөрбөтүн уурдулар. Маны таһынан, биир идэлээхтэрбитигэр Ил Дархан наҕаарадалары туттартаатаэ В.В. Никифоров-Күлүмнүүр аатынан судаарыстыбаннай бириэмийэни биллэр суруналыыска, публицистка, суруйааччыга, Күлүмнүүр аатын үйэтитиигэ сүҥкэн кылаатын киллэрбит, "Киин куорат" хаһыан сүрүн эрэдээктэригэр Иван Петрович Ущницкайга туттарылынна. Оттон Н.Е. Мординов-Амма Аччыгыйа аатынан Ил Дархан бириэмийэтин эмчит, СӨ Суруйааччыларын сойууһун чилиэнигэр Валентин Владимирович Егоровка туттарда.
Отто Бэчээт дьиэтигэр бырабыыталыстыба бэрэссэдээтэлин солбуйааччы С.В. Местников, инновация миниистирэ А.А. Семенов, Ил Түмэн дьокутаата Ф.В. Габышева уонна Саха сирин Суруналыыстарын сойууһун бэрэссэдээтэлэ Г.А. Бочкарева эҕэрдэлээтилэр, биир идэлээхтэрбитигэр наҕараадалары туттартаатылар. Маны таһынан, "Арассыыйа Почтата" ФГУП Саха сиринээҕи салаатын салайааччыта Петр Птицын "Кыым" хаһыат сурутааччытынан Саха сиригэр эрэ буолбакка, Уһук Илиҥҥэ инники күөҥҥэ сылдьарын, ону ааһан Арассыыйаҕа элбэх сурутааччылаах 1000 хаһыаттан 26-с миэстэҕэ сылдьарын тоһоҕолоон бэлиэтээтэ уонна ону туоһулуур докумуону эрэдээктэр Иван Гаврильевка, итиэннэ 100 сыллаах үбүлүөйдээх эрэдээксийэҕэ махтал суругун туттарда.
"Ситим-медиа" дириэктэрэ Вераника Павлова "Гражданскай килбиэн" наҕарааданы Сергей Местниковтан тутта оттон "Ситим" медиа-бөлөх генеральнай дириэктэрин солбуйааччы Мария Данилова Ил Түмэнтэн үрүҥ көмүс бэлиэни тутта.
