Саха сирэ сотору бэйэбит космонавтаныахпытын сөп. Ол курдук, биһиэхэ космонавтары бэлэмниир бырагыраама үлэлээн эрэр. Бырагыраама сыала-соруга – Саха сиригэр төрөөбүт космонабы бэлэмнээһин диэн.
Ааһан эрэр сыл бэс ыйыгар буолбут тэрээһин үлэ мунньаҕар, хандьыдааттары таларга хамыыһыйа тэриллиэхтээҕин туһунан кэпсэтии буолбут. Саргылана Захарова, К.Э. Циолковскай аатынан Арассыыйа Космонавтикаҕа акадьыамыйатын илиҥҥи эрэгийиэннээҕи отделениетын сиэксийэтин салайааччыта үс бастакы хандьыдаат талыллыбытын туһунан иһитиннэрбит.
Ону кытта саппааска өссө 12 хандьыдаат баар – бу бары “Якутия”хампаанньа пилоттара, кинилэр бастакы ирдэбилинэн сөп түбэһэллэр, ону кытта “Полярные авиалинии” хампаанньа 4 лүөччүгэ баар. Хандьыдааттары доруобуйаларын туругунан таларга, мэдиссиинэ өттүнэн толору чинчийиини барыахтаахтар. Онуоха физическэй эрчиллиилэри оҥорорго норматив бигэргэниэхтээх үһү.
Бу бырагырааманы олоххо киллэрии биэс сүрүн кэрдиистэн турар. Онтон биирдэстэрэ – хандьыдааттары манна Саха сиригэр талан ылыы уонна салгыы Роскосмос космонавтарын этэрээтигэр бэлэмнэтэ ыытыы. Бырайыак 2016-2025 сс. ылыллыбыт Федеральнай куосумас бырагырааматын чэрчитинэн үлэлиир.
