Тохсунньу 25 күнүгэр, «Сэргэлээх уоттара» культура киинигэр М.К. Аммосов аатынан Хотугулуу-Илиҥҥи федеральнай үнүбэрситиэт Арассыыйа устудьуоннарын күнүн онлайн киэбинэн бэлиэтээтэ.
Саха сирин Парламенын аатыттан, Ил Түмэн Бэрэссэдээтэлин солбуйааччы Антонина Афанасьевна Григорьева преподавателлэри, устудьуоннары эҕэрдэлээтэ уонна үөрэхтэригэр бастыҥ уонна общественнай үлэҕэ көхтөөх устудьуоннарга – юридическай колледж 2 курсун устудьуонугар Анастасия Алексееваҕа, физико-техническэй үнүстүтүүт 4 курсун устудьуонугар Александр Максимовка, естественнэй наукалар үнүстүтүүттэрин 2 курсун устудьуона Ян Тарабукиҥҥа СР Ил Түмэнин Бэрэссэдээтэлин солбуйааччы махтал суруктарын туттарда. Бу күн, үгэс быһыытынан, Үнүбэрситиэт бастыҥ выпускниктара ааттаннылар. «Бастыҥ выпускник – үнүбэрситиэт киэн туттуута» М.К. Аммосов аатынан ХИФУ бочуоттаах аата СР Ил Түмэнин Бэрэссэдээтэлин бастакы солбуйааччы Александр Николаевич Жирковка иҥэрилиннэ.
Александр Жирков орто оскуоланы бүтэрэн баран, оччотооҕу кэм “Оскуола-производство-үрдүк үөрэх” диэн ыҥырыытынан салайтаран, “Лена” совхозка үлэлээн, Сэбиэскэй аармыйа кэккэтигэр сулууспалаан, ытык иэһин толорон баран, Саха Судаарыстыбаннай үнүбэрситиэтигэр историко-филологическай факультеты историческай салаатыгар үөрэнэ киирбитэ. Туйгуннук үөрэнэн, кыһыл дьупулуомунан бүтэрбитэ. Өрүү инники күөҥҥэ сылдьар лидер, устудьуоннар тутар этэрээттэрин салайар, хамаандыыр этэ. Хайа да түгэҥҥэ, олоҥхо бухатыырыныы, бэйэтэ туспа көрүүлээҕин, этэр этиилээҕин, тутуһар позициялааҕын кини устудьуоннуур кэмигэр, 1979 с. буолбут түбэлтэ туһунан билигин номоххо киирбит кэпсээнтэн да билэбит. Александр Николаевич Жирков - Георгий Прокопьевич Башарин элбэҕи эрэммит уонна кини эрэлин толору толорбут чаҕылхай үөрэнээччитэ. Кини үнүбэрситиэт, саха инникилээн иһэр өйдөөх-санаалаах дьонун кыһатыгар уһаарыллан-хатарыллан тахсыбыта. Аспирант, үөрэммит факультетын ССРС историятын хаапыдыратын ассыстыана, ыстаарсай преподаватель, Саха сирин уонна Арассыыйа Хотугулуу-илиҥҥи норуоттарын устуоруйатын уонна култууратын хаапыдыратын доцена – Александр Жирков үүнүүтүн кэрдииһин кэмнэрэ үнүбэрситиэти кытта быстыспат ситимнээх.
Билигин Александр Николаевич Жирков – Россия бэлитиичэскэй уонна уопсастыбаннай деятелэ. РФ Федеральнай Мунньаһа Госдума иһинэн Арассыыйа сокуону таһаарааччыларын Ассамбылыайатын чилиэнэ, “Дальний Восток и Забайкалье” Парламент Ассоциациятын чилиэнэ, “Эпосы народов мира” Аан дойдутааҕы Ассоциация вице-президенэ, Аан дойдутааҕы музейдар Сэбиэттэрин - ИКОМ чилиэнэ, СӨ Ил Дарханын иһинэн Олоҥхо Национальнай тэрийэр кэмитиэтин Бэрэссэдээтэлэ, М.К. Аммосов аатынан ХИФУ учуонай сэбиэтин чилиэнэ, СР агропрофилированнай оскуолалар Сойуустарын Бэрэссэдээтэлэ, 2014 с. Бочуоттаах Бэрэсидьиэнэ, СӨ Ил Түмэн Судаарыстыбаннай Мунньах V ыҥырыытын Бэрэссэдээтэлэ. Саха судаарыстыбаннай үнүбэрситиэтин историко-филологическай факультетын 1981 с. бастыҥ выпускнига.
Александр Николаевиһы үөрэммит-үүммүт үнүбэрситиэтин бочуоттаах аата иҥэриллибитинэн истиҥник эҕэрдэлиибит уонна Эн – биһиги норуоппут киэн туттуута буолаҕын диэн этэн туран, үрдүк судаарыстыбаннай үлэҕэр, аан дойдутааҕы таһымнаах гуманитарнай бырайыактаргар үрдүк ситиһиилэри, бөҕө доруобуйаны, дьолу-соргуну баҕарабыт.
Ил Түмэн пресс-сулууспата
