Вирус саҥа штамма олус сыстыганнаах буолан, аан дойдуга, онтон Арассыыйаҕа чыпчылыйыах түгэнэ тарҕана оҕуста. Тохсунньу 25 күнүнээҕи туругунан Арассыыйаҕа “омикрон” 71 эрэгийиэҥҥэ номнуо бэлиэтэммит. Вирус билиҥҥитэ Кострома, Тверь, Белгород, Тула уобаластарыгар, Ивановскай, Курскай уобаластарга, Ненецкэй автономнай уокурукка уонна Новосибирскай уобалаһыгар эрэ тиийэ илик да, этэллэринэн, бэлиэтэнэрэ субу хаалбыт.
“Удаленкаҕа” көстүлэр
Ааспыт сууккаҕа Арассыыйаҕа хамсыкка барыта 67809 киһи ыалдьыбыт диэн биллэрдилэр. 12 837 киһи балыыһаҕа киирэр туруктаммыт (госпитализация). “Вакцина эрэ туһалыыр” диэн, быһыы туруорар хампаанньа көхтөөхтүк бара турар – барыта 81 981 007 киһи бастакы вакцинаны ылбыта. Быһыы биэрэр пууннарга билигин да уһун уочараттар, дьон үксэ хаһыс да вакцинатын ылаары кэлэр. Эрэгийиэннэр “удаленкаҕа”, “дистанционкаҕа” көстүлэр.
Ыалдьааччы өссө эбиллиэ
“Москуба уобалаһыгар бастакы сүһүөх мэдиссиинэҕэ ноҕурууска аһара улаатта”, – диэбит күбүрүнээтэр Андрей Воробьев. – Күҥҥэ 50 тыһ. бырааһы ыҥырыы бэлиэтэнэр – бу урукку көрдөрүүнү уонча төгүл куоһарар. Бэҕэһээ, иллэрээ күн ол өссө 57 тыһ. ыҥырыыга тиийэ сырытта. Онон, устудьуоннары эбии көмөҕө ылан үлэлэтэн эрэбит. Поликлиникалар эмиэ өрөбүлэ суох, сарсыарда 8 чаастан киэһэ 20.00 чааска диэри үлэлииллэр”.
“Ыалдьааччы ахсаана өссө улаатыан сөп” диэбит биология билимин хандьыдаата, Стратегическай сайдыы киинин сүбэһитэ Евгений Тоневицкай. Кини “саас ыалдьыбыт киһи ахсаана 1,5-2 мөл. тиийиэ” диэн сабаҕалыыр. “Тохсунньу саҕаланыаҕыттан ыалдьыы эбиллэ эрэ турар. Ыарыы маннык күүстээх долгуна саҕаламмыта дьонтон бэйэлэриттэн тутулуктаах. Мааскалаах сылдьыы, быраабыланы тутуһуу, сэрэхтээх буолуу, вакцинация туһунан мэлдьи саната сылдьар наада”, – диир учуонай.
Нина Герасимова матырыйаалыттан
