Накыыннааҕы баахта бөһүөлэгэр АЛРОСА Ньурбатааҕы хайа байытар кэмбинээтин үлэһиттэрэ олороллор.
Накыын уруудалаах хонуута улуус киинэ – Нурба куораттан, быһа холуйан, – 200 км, оттон Мииринэйтэн 300 км тэйиччи сытар. Накыын бөһүөлэгин түргэн тэтимнээх интэриниэт ситиминэн хааччыйар туһунан быһаарыыны 2019 сыллаахха АЛРОСА инвестицияҕа кэмитиэтэ быһаарыы ылынан турар. Сонно тута Мииринэй – Накыын туһаайыытынан барыахтаах волоконно-оптическай ситими тардыы тэрээһинэ саҕаланан барбыта. Бу саҥа көрүҥ лииньийэни тардыы баахта үлэһиттэрэ сибээс хаачыстыбалаах ханаалынан туһанар кыахтаналларыгар уонна ыраах былаһааккаҕа оҥорон таһаарыы соруктарын толоруу түргэн тэтимнэнэригэр көмөлөһөр.
«Сибээс саҥа ханаалын оҥоруу өссө 2019 сыл алтынньытыгар саҕаламмыта. Онтон бэттэх тутууну ыытан, наладкалаан, сибээс саҥа учаастагын үлэҕэ киллэрдилэр. Саҥа тардыллыбыт волоконно-оптическай лииньийэ уопсай уһуна 182 км. Бырайыак толору сыаната, туох баар тутар-мантаастыыр үлэ бары түһүмэхтэрин, сибээс ханаалын төлөбүрүн киллэрэн туран, 140 мөл. солк. тахса буолла. Бырайыак бэдэрээччитэ - «Ростелеком» ПАО филиала – Сахателеком ПАО «Ростелеком» (Дьокуускай к.)», - диэн, бэлиэтээн эттэ АЛРОСА информационнай технологияларга дириэктэрэ Максим Каданцев.
Бырайыагы олоххо киллэрии түмүгэр ханаал иһитиннэриини аһардар балаһата улаатан, интэриниэт тэтимэ 1 Гбит/сөк. буолара ситиһиллибит. Онон Ньурба ХБК корпоративнай иһитиннэрэр тиһигэр сибээс бытаанын кыһалҕата суох буолла. Накыын былаһааккатыгар тиийэр сибээс хаачыстыбата хас да бүк тубуста, ону ааһан спутник ханаалларын уларсарга көрсүллэр ночоот аҕыйаата.
Ону таһынан бырайыагы олоххо киллэрии чэрчитинэн, суотабай сибээс икки тирэх ыстаансыйатын саҥардан биэрдилэр: 15-с фабрика сибээскэ узелын уонна баахта бөһүөлэгин былаһааккатыгар баары. Бу түмүгэр Накыын сиригэр-уотугар бүтүннүүтүгэр суотабай сибээс LTE ыстандаардын үчүгэй ханаала үлэлээн, дьоҥҥо табыгастаах буолла.
2019 сыллааҕы “Хаһаайыстыбаннай актыып” корпоративнай форумугар сибээс мөлтөҕө этиллибитэ, онон бу бырайыак олоххо киириитэ ол кыһалҕаны туоратта.
