Саха сиригэр, Мииринэй оройуонугар, бу сылга 10-с тыһыынча оҕонон төрөөбүт кырачааны чиэстээтилэр. Оҕочоон Удачнай куоракка Прасковья уонна Альберт Даниловтар дьиэ кэргэннэригэр төрдүс оҕонон күн сирин көрдө.
Саҥа киһини үөрүүлээхтик чиэстээһин куорат дьаһалтатыгар Ийэ күнүн бырааһынньыгын иннинэ буолла. Дьоллоох дьиэ кэргэни Удачнай куорат баһылыгын эбээһинэһин толорооччу Ольга Балкарова уонна Горсовет бэрэссэдээтэлэ Вячеслав Файзулин эҕэрдэлээтилэр. Ыалга Саха сирин үлэҕэ уонна социальнай сайдыыга Министиэристибэтин сибидиэтилистибэтин кытта үрүҥ көмүс Харысхалы бэлэхтээтилэр.
Прасковья уонна Альберт Өлөөн оройуонун Жилинда нэһилиэгиттэн төрүттээхтэр. Кинилэр ыал буолан баран Удачнайга көспүттэр эбит. Ыал саҥа кырачаана алтынньы 1 күнүгэр күн сирин көрбүт, киниэхэ Айтал диэн ааты иҥэрбиттэр. Уолчаан бииргэ төрөөбүттэрин курдук бухатыырдыы обургу буолан биэрбит – 4 киилэттэн тахса ыйааһыннаах буолбут.
«Миэхэ оҕоҥ Саха сиригэр 10-с тыһыынча оҕонон төрөөтө диэбиттэригэр кыра шок буолан ылбытым, бастаан итэҕэйбэккэ хаста даҕаны хаттаан ыйыппытым», - диэн Прасковья Борисовна үөрүүтүн үллэстэр.
Сотору кэминэн, элбэх оҕолоох Даниловтар дьиэ кэргэннэригэр Саха сирин олохтооҕун Хаартата олохтонуоҕа, оҕолоох дьону өйүүр бары социальнай өйөбүллэрдээх миэрэлэр оҥоһуллубуттара.
Саха сирин үлэҕэ уонна социальнай сайдыыга Министиэристибэтин пресс-сулууспата
