Муус устар 1 күнүттэн 65 саастарыттан үөһэ үлэһиттэргэ балыыһа илииһин толоруу уурайыаҕа

Быстах кэмҥэ киллэриллэ сылдьыбыт үлэлиир кыаҕа суох буолуу - балыыһа илиистэрин толоруу быраабылалара, 2021 сылтан, муус устар 1 күнүттэн сокуоннай күүстэрин сүтэриэхтэрэ. «Арассыыйа Федерациятын бырабыытылыстыбатын сорох аахтара сокуоннай күүстэрин сүтэрбиттэринэн сибээстээн уонна үлэ биэрээччилэр 65 саастаах итиэннэ онтон үөһээ саастаах үлэһиттэрин ыраахтан олорон үлэлииргэ көһөллөрүгэр сүбэлииллэригэр» - диэни ааттаах Саха өрөспүүбүлүкэтин бырабыытылыстыбатын саҥа уурааҕа олоххо киирбитинэн сибээстээн.

Бу уурааҕынан сибээстээн, аны балыыһа илиистэрэ 65 – тээх уонна онтон үөһэ саастаах дьоҥҥо төлөммөт буолуохтара. Санатар эбит буоллахха бу иннинэ Арассыыйа Федерациятын бырабыытылыстыбата бигэргэппит “Карантин, хааччахтааһын кэмигэр быстах кэмҥэ үлэлиир кыаҕа суох буолуу туһунан - балыыһа илиистэрин 65 – тээх уонна онтон үөһэ саастаах дьоҥҥо төлүүргэ” 01.04.2020 тахсыбыт уурааҕынан көннөрү төлөнөн испит буоллаҕына, аны 2021 сыл муус устар 1 күнүттэн төлөммөт буолуоҕа. Балыыһа илиистэрэ булгуччу чопчу ханнык эрэ ыарыы, мэдэссиинэ көрдөрүүтүнэн эрэ толоруллар ирдэниэҕэ.

Арассыыйа Федерациятын бырабыытылыстыбатынан ( 300 № - дээх уураах, 02.03.2021 с.) тэрилтэ салайааччыларыгар бэйэлэрин көрүүлэригэр 65 саастаах уонна онтон үөһэ саастаах үлэһиттэрин ыраахтан олорон үлэлииргэ көһөрөргө сүбэлээбиттэрэ.

Мантан сиэттэрэн, аны саҥа уураахха олоҕуран, 65 уонна онтон үөһэ саастаах дьоҥҥо маннык үлэ көрүҥнэрэ хааллылар:

• Ыраахтан олорон үлэлээһин – тэрилтэ салайааччытын бэйэтин көрүүтүнэн.
• Аһаҕас үлэҕэ тахсыы, Аҕа Баһылык 3.02.2021 с., тахсыбыт 1665 № - дээх: “Саха өрөспүүбүлүкэтин Аҕа Баһылыгын сорох уураахтарыгар уларыйыы киирэрин туһунан - 65 уонна онтон үөһэ саастаах дьон, хайаан да вакцинацияны ааспыт эрэ буоллахтарына эбэтэр хамсыгынан ыалдьан баран үтүөрбүтүн туһунан ыспыраапкалаах эрэ буоллаҕына аһаҕас үлэҕэ тахсарга көҥүллүүргэ ” - диэн уурааҕар олоҕуран.
• Уочараттаах уоппуска ылыы, эбэтэр хааччыйыыта суох уоппускаҕа барыы үлэһит бэйэтин сайабылыанньатынан.