От ыйын 2 күнүгэр Саха сиригэр Өлүөнэ өрүс күнүн бэлиэтииллэр. Ол чэрчитинэн, сылын ахсын экологическай тэрээһиннэр ыытыллаллар. Быйыл саамай улахан тэрээһининэн “Өлүөнэ өрүс – Саха сирин киэн туттуута!” диэн ыытыллыаҕа. Тэрээһин Ленин болуоссатыгар күнүс 12 ч. буолуоҕа. Бу туһунан СӨ Экология министиэристибэтэ иһитиннэрэр.
Куорат киин болуоссатыгар бу күн ууну холоон көрүүгэ, уу эбийиэктэригэр мониторинг чинчийиилэрин ыытарга маастар-кылаас буолуоҕа. Маны таһынан, “Лена волнуется раз!” диэн ыччат флешмоба, Өлүөнэ өрүһү билиигэ квест-оонньуу, оҕолор аспаалга уруһуйдарын күрэҕэ, остуол оонньуулара, кинигэ сүрэхтэниитэ, быыстапка уо.д.а. буолуоҕа.
Ыччат флешмоба болуоссакка 13 ч. буолуоҕа. Онно кыттарга күөх, халлаан күөҕэ таҥас ирдэнэр. Бу күн, улуу өрүс аатынан ааттаммыт леналар, “Лена” киинэ тыйаатырыгар босхо билиэти уонна профессиональнай фотосессияны бэлэх тутуохтара.
Бырааһынньыктааҕы тэрээһин “Ыраас кытыл” диэн Өлүөнэ кытылын ыраастааһыҥҥа экология аахсыйатынан түмүктэниэҕэ. Суббуотунньук 16 ч. Даркылаахха баар кыһыҥҥы өрүһү туоруур суол түөлбэтигэр ыытыллар. Манна барыгытын көхтөөхтүк кыттарга ыҥыраллар.
Санатар буоллахха, Өлүөнэ күнэ 2013 сылтан ыла бэлиэтэнэр.
