Өрөспүүбүлүкэ хотугу улуустарыгар халааҥҥа бэлэмнэнэн эрэллэр. Дьааҥы, Индигиир уонна Халыма өрүстэр нэһилиэнньэлээх пууннарга кутталы үөскэтэллэр. Ол туһунан бырабыыталыстыба бэрэссэдээтэлин солбуйааччы Дмитрий Садовников иһитиннэрдэ.
“Сааскы халаан билгэтэ үчүгэйи эрэннэрбэт. Дойдуга, аан дойдуга туох буола турарын көрө олоробут. Биһиги да өрөспүүбүлүкэбитигэр былаас уонна тустаах тэрилтэлэр болҕомтолорун эрэйэр “чараас” сирдэр бааллар. Бүгүн биһиги хамыыһыйабыт Орто Халыма улууһугар үлэлиир. Арктика улуустарын кытта ыксаллаах быһыы-майгы мунньаҕын ыыттыбыт. Онтон көстөрүнэн, Дьааҥы, Индигиир уонна Халыма өрүстэр нэһилиэнньэлээх пууннарга кутталы үөскэтэллэр. Бүгүҥҥүттэн саҕалаан муниципальнай тэриллиилэри кытта халаан үлэтигэр бэлэмнэнэн барабыт”, – диэн Дмитрий Садовников бэҕэһээ, муус устар 17 күнүгэр, эппит.
СӨ Ил Дархана Айсен Николаев халааны утары ыытыллар үлэ хонтуруолун күүһүрдэргэ эппитэ. Санаттахха, быйыл саас Саха сиригэр муус устарга халлаан тэмпэрэтиирэтэ орто таһымынан буолара сылыктанар. Оттон өрүстэр уруккуларын курдук эбэтэр 1 – 3 күнүнэн эрдэлээн эстиэхтэрин сөп.
Бырабыыталыстыба бэрэссэдээтэлин бастакы солбуйааччыта Дмитрий Садовников эппитинэн, халааны таһынан сааскы-сайыҥҥы баһаардары утары үлэ эмиэ күүскэ ыытылла турар. Ол курдук, быйыл ойуур баһаардарын умулларыыга Якутлесресурс уонна Авиалесоохрана үлэһиттэриттэн 1200-тэн тахса киһини кытыарыахтара.
“Ойуур баһаарын утары үлэ сүнньүнэн РФ Айылҕа ресурсаларын уонна Россельхознадзор бэрэбиэркэлэрин кэтэһэбит. Бары киритиэрийдэринэн эбээһинэс толоруллубута. Бэрэбиэркэҕэ бэлэммит”, – диэн Дмитрий Садовников анаан бэлиэтээбит.
Номнуо ыам ыйыттан саҕалаан Саха сирин соҕурууҥҥу улуустарыгар үрдүк кылаастаах баһаар куттала күүтүллэр. Авиалесоохрана билгэтинэн, 2024 сыллаахха Саха сиригэр ойуурдар бэс ыйыттан саҕалаан атырдьах ыйыгар диэри 2021 сыллааҕы курдук умайыахтарын сөп.
