Эрэдээксийэҕэ Мииринэй Арыылааҕын олохтооҕо А.В. Григорьев диэн ытык кырдьаҕас эрийэн кыһалҕатын кэпсээтэ:
-- Бөрө кыыл биһигини буулаан сордоото. Мин сылгы иитэбин, түөрт сылгыбын тартылар. Бэйэм булчуппун, үйэбэр 40-ча бөрөнү өлөрбүтүм. Майгыларын-сигилилэрин билэбин. Урут бороһуок дьаатынан өлөрөр эрдэхтэринэ үчүгэй этэ. Билигин хайдах сылгыларбытын быыһыахпын билбэппин. Бөрөнү бултаһыҥ диэн оройуоммут баһылыгар Р.Юзмухаметовка быйыл кыһын үстэ эрийэ сырыттым. "Үлэлиэхпит, бултуохпут" диир да, бөрө аҕыйаабат. Онон айаҕалыы сатаан, арааһы барытын толкуйдуу сатыыбын. Холобур, бөрө сылгыга, табаҕа бастаан такымыгар түһэн быһыта тыытар, сылатан охторор, хабарҕатыгар кэлин тиийэр. Онон сылгы такымыгар бөрө хараҕын уотуттан умайан кэлэр (цветоотражающай) матырыйаалы оҥороллоро буоллар, “күлүм” гыннаҕына чаҕыйан тохтуон сөп этэ диэн санаа кытта киирэр. Ол тохтуу түстэҕинэ, сылгы куотар. Оннук курдук албаһы оҥоруохтарын сөп дуо диэн ыйыталаспаккыт ээ, - диэтэ.
-- "Дьикти фантазиялаах эбиккин. Оттон сылгы такымын куһаҕан сыттаах бэссэстибэнэн соттоххо, эбэтэр кутуругар чуораан баайдахха - чаҕыйыа дуо?", - диэн көх-нэм буолабын.
-- Туһата суох, амтаҥҥа кыһаммат кыыл, урут бэтэринээрдэр куһаҕан сыттаах эминэн да сотуллубут сылгыларын, табаларын да тардаллара. Табалардаах эрдэхпинэ, чуорааннаахтары, дьэ, дьаныһан туран бултаһаллара, - кырдьаҕас бөрөнү итинник чаҕыппаккын диир.
Бөрө тардар сылгытын, табатын ахсаанын, харчыга турар сыанатын аахтахха, сыл аайы өрөспүүбүлүкэ үрдүнэн дьоҥҥо-сэргэҕэ улахан хоромньу оҥоһуллар. Бөрөнү бултаһыы кэлин сокуонунан элбэх хааччахтанна. Онон ити Алексей Васильевич этэрин курдук, туох эрэ ураты сылгыттан тэйитэр аныгы технология албаһын толкуйдаабыт киһи, чахчы бэрт буолуо эбит.
Аны мин төбөбөр араас идиэйэлэр көтөн киирдилэр. Арай диэ... сылгы такымыгар бөрө тииһин күүһүттэн сырдаан, тыаһаан кэлэр, эбэтэр кыра тогунан охсор чулку курдугу оҥорон кэтэрдэр албас адьырҕаны куттуо эбитэ буолуо дуо?
Саха сирин соҕуруу өттүгэр аҕыйах сыллааҕыта биир киһини эһэ саба түһэн мадьыктаан өлөрөн истэҕинэ, суотабайа тыаһаан тоҕо баран адьырҕа соһуйан тыаны былдьаһан быыһаммыт диэн сонун баара.
Онон, доҕоттоор, аныгы технологияны, инновацияны мииммит эдэр дьоммут, учуонайдарбыт да элбэхтэр, итинниккэ майгынныыр албаһы айар кыаллыа дуо?
Владимир Степанов.
