Хара сарсыардаттан буруо сыта дьиэлэр подъезтарыгар кытары биллэр. Оттон таһырдьа – ыыс-быдан буруо.
Хап-хабархай, киһи тыҥатыгар аһытан киирэр үгээрдиир гаас булкадаһыктаах салгын. Уулуссаҕа сылдьар дьоннор мэйиилэрэ эргийэн, харахтара хараҥаран, ыксаан кондиционердаах маҕаһыыннарга хорҕойдоҕо буолаллар.
Куораппытыгар, таһырдьа аһаах туруктаах киһи, тоҥ күөс быстыҥа да сылдьара, доруобуйатыгар кутталлаах курдук.
Ол курдук углерод оксида икки бүк нуорматын куоһарбыт. Ону тэҥэ, салгыҥҥа азот диоксида курдук сүрдээх буортулаах эттик баар.
Дьэ бу Мииринэй уонна Таас-Үрэх икки ардыларыгар баар №14-дээх, Сүлдьүкээрдээҕи №18-дээх, эбиитин Оччугуй Ботуобуйа үрэх уҥуорунааҕы(Сунтаар сирэ) улахан баһаардар содуллара. Ыарахан!
Мантан сылтаан, Москубаттан кэлбит ЫБМ уонна Арассыыйа Сэбилэниилээх Күүстэрин «ИЛ-76», «БЕ-200» сөмөлүөттэрэ тыаны умуруора көппөтөхтөрө ыраатта. Мииринэй авиапуордугар ньимиччи олороллор. Буруоттан сылтаан, бу нэдиэлэ чэппиэригэр диэри Дьокуускайдыыр сөмөлүөт көппөт.
Бэҕэһээ, тоҕус сорунан, Новосибирскайтан кэлбит сөмөлүөт Мииринэй пуордугар түспүтэ. Бу сарсыарда 11 чааһы ааһыыта биир эрэ сөмөлүөт Москубалаата. Атыттар олороллор. Соҕуруу барааччылар хаайтардылар. Баксаал – толору, көстүүнэйдэр – ыы-быччарылар.
Баһаар буруота Өрөспүүбүлүкэ таһымнаах суолу көстүбэт ыыс-быдан, туман-имэн оҥорон, Айхал, Удачнай диэки массыына сырыыта тохтотулунна.
Муҥ сатаатар уот умуруорааччыларбыт ахсааннара аҕыйах. Волонтердар тустарынан истэ иликпин.
Бачча кыахтаах промышленнай оройуоҥҥа вездеходтара, тыраахтырдара, бульдозердара тиийбэт ааттаах.
Ханна сүттүлэр геологическай тааҥкалар, бөртөлүөттэр, мульчердар?!
Маннык буруоҕа олорбуппут ый кэриҥэ буолла. Салгыы дьэ хайдах буолабыт?!
Станислав Алексеев. Мииринэй куората.
