Бүгүн ааҕааччыбыт Кирилл Платонов Маанылаах Маалыкайыгар кэрэ куоластаах ырыаһыт бэрдэ, хара көстүүмнээх тураах котоку кэлбитин туһунан биллэрдэ, үөрүүтүн үллэһиннэ.
«Аны күһүн, өлгөм үүнүүнү ылаары, хортуоскам сиригэр иһит- хомуос сууллубут , сыалаах- арыылаах , араас микроэлеменнэринэн баай ууну-хаары тоҕо тахсан, аа-дьуо уҥа-хаҥас , үөһэ- аллара көрө, саҥа түспүт хаарга чөм - чөм, чөкө-чөкө маадьаччы-үмүрүччү үктэнэн, муннум анныгар «Ньургуһуннар» диэн ырыаны киҥинэйэ ыллаан, салгыны хамсата сэгэйэ хааман , чуор даллаҕар кулгаахтарбынан ыраах тыраахтыр тыаһын , ыт үрэрин , атыыр кистээн дьырылатарын , эрдэһит ыал атыыр оҕус тыһаҕаһа иһин түгэҕиттэн айылҕата өтөн айаатыы сатыырын истэ сэргии , күн көрөр утахтарыттан хап харанан көрөр мохсоҕол кыраҕы харахтарбын симириҥнэтэ истэхпинэ иннибэр дуу, кэннибэр дуу, уҥа дуу, хаҥас дуу тураах саҥата дааҕырҕаабытын истэн, тутан испит солуурдарбын мүччү тутаттаан «Дороообоо» диэн кээхинээбиппин бэйэм да билбэккэ хааллым.
Кыараҕас харахтарбын кэҥэтэн, ырааҕы-чугаһы көрө сатаатым, куллукулаах кулгаахтарбын эбии даллатан, үөрэн даллайан таалан турдум... Ханна эрэ тураах өссө төгүл миэхэ хардаран «Даах-даах, дорообо» диирэ иһилиннэ , төһө да бэйэтин күндү көмүс күлүгүн да көрбөтөрбүн, солуурдарбын уһаан хаалбыт илиилэрбинэн хаба тардан ылаат, түөһүм муҥунан сааскы салгыны ыймахтаат, тиэрэ-таары үктэнэн, дьиэрэҥкэйдээн тэбэн, сонуммун үллэстэ хараҕым муҥунан көрөн, дьиэм диэки тэбинним. Батыһан тиийбит ытым оҕотун үрдүнэн көтөн кылабачыйан аастым, ааммын аһаат, «Урааааа! Тураах кэлбит диэн баарбынан-суохпунан эҥсэн тэһэ бараат, аныгы киһи сиэринэн төлөпүөнүм үрдүгэр түһээт, үөрүүлээх-көтүүлээх сонуммун тиритэ-хорута , чабырҕайым тэбэ, сүрэҕим тэбиэлии, хааным сүүрэрэ түргэтээн, суруйан эһигинниин үллэстэ тилигирии олоробун.
Кирилл Гаврильевич саҥа кэлбит тураах саҥатын сарсыарда 8 чаас 45 мүнүүтэҕэ истибит. Халлаан экчи - 0 кыраадыс, былыттаах, түүн хаардаабыт, кыра салгыннаах эбит.
