Сэбиэскэй кэмҥэ оскуола оҕолорун сайын ыанньыксыттары солбуйтара сайылыкка таһаарар этилэр. Мин эмиэ ол хампаанньаҕа кыттыһан, улуус кииниттэн ийэм дойдутун оҕолорун кытта сайылыкка тахсыспытым. Оччолорго дьон абааһыттан соччо куттаммат курдуга. Оҕолор киэһэ аайы абааһылаах кэпсээннэри биһигиттэн атын кэмҥэ – былыр буолбутун курдук кэпсэтэрбит. Сэрэнэн-сэрбэнэн сылдьарбытын, сиэри-туому тутуһа сатыырбытын өйдөөбөппүн.
Биирдэ күнүскү ыам кэнниттэн чугас эргини көрөн кэлэргэ санаммыппыт. Ыанньыксыт кыргыттары кытта бостуук уолбут барсыбыта. Икки тыаны нөҥүөлээн, дьон олоро сылдьыбыт сиригэр тиийбиппит. Онно сэнэх соҕус балаҕан баара. Иһирдьэ киһи сэргиирэ туох да суоҕа. Арай оһох кэннигэр эргэ сылабаар турара. Ону таһааран, суругун-бичигин көрө сатаабыппыт. Бостуук уолбут: «Илдьэ баран, күһүн оскуола түмэлигэр туттарыаҕыҥ», – диэн тыл көтөхпүтэ. Онон туох да кэтэх санаата суох сылабаары сайылыкпытыгар аҕалан, олорор дьиэбит аанын таһыгар олордон кэбиспиппит.
Онтон атынын оҕолор кэпсээннэриттэн суруйабын. Мин оччоттон баччаҕа диэри күүскэ утуйар идэлээхпин. Сыттым да, тугу да истибэппин. Ол түүн дьиэбит тула үөр сылгы туйаҕын тыаһа дьиэни эргийбит. Өр баҕайы оннук эргийэн баран, ханна да барбыттара-кэлбиттэрэ биллибэккэ, сүтэн хаалбыттар. Ол да иһин сарсыҥҥы күнүгэр миигин кытта бииргэ үлэлиир Тася дэлби утуктаан муҥнаммыта. Сарсыҥҥы күнүгэр ол эмиэ хатыламмыт. Миигиттэн ураты оҕолор бары истибиттэр. Онтон эбиэккэ саҥата суох аһыы олордохпутуна, барыбытыттан аҕа кыыспыт сылабаары оннугар уурарга эппитэ. Бу сырыыга ким да, тугу да саҥарбакка, бары тутуспутунан били балаҕаммытыгар тиийэн, сылабаарбытын оннугар уурбуппут. Кыыспыт сыһыыга алаадьы ууран эрэрин өйдүүбүн. Ол кыыс кэлин төрүт култуура учуутала буолбут этэ. Оччоттон сиэргэ-туомҥа сыһыаннаах эбит. Ол кэмнээҕи оҕо оскуолатын, кылааһын чиэһин үрдүктүк тутара. Онон оскуолатын түмэлин байытар сыалтан сылабаары ыларга сөбүлэммитэ эбитэ буолуо.
Дьиктитэ диэн, малы оннугар уурбут күммүтүттэн тыас-уус тохтообут этэ. Сайылык оҕолоро оннубутугар түһэн, оҕо саас көрдөөх, дьоллоох сайына салҕаммыта.
Ирина, Чурапчы.
