Манна кэпсэнэр барыта кырдьык буолбатах. Сороҕун дьонтон истибитим, сороҕун онтон-мантан «сойбоппутум», ону, көрү-нары тарда таарыйа, бэйэм ааппыттан кэпсиибин.
Горуох миин содула
Лэкиэс биир хостоох квартиралаах. Соҕотоҕун олорор. Соҕотох уол сиэринэн сотору-сотору кыргыттары аҕалан хоннорор эҥин.
Ол сылдьан, арай биирдэ миигин «аһынар» амарах санаата киирэн:
– Чэ, доҕоор, киэһэ миэхэ бардыбыт. Аккаастанарыҥ адьас сатаммат! – диэн ыҥырааччы буолла.
Киһи биирдэ көрдөспүтүн туох диэн аккаастыамый? Бардыбыт. Саатар, соругун сүгүн эппэт. Тиийдэхпинэ этиэм диир. Тиийдибит. Арай киһим, аанын аһаары туран, «инструктажтаах» буолан биэрдэ.
– Дьэ, ноко, биһигини иһирдьэ икки кыыс кэтэһэн олорор. Онтон биирэ эйиэнэ. Олох ол-бу буолума, оттон сөбүлээбэтэххинэ, кыратык кэпсэтэн баран, дьиэлээр ээ, – диэннээх.
Хайыахпыный, бачча кэлэн баран, киирэр буолан хааллым.
Киһим, киирээт да, миигин хараҥа хоско анньан баран:
– Сейчас, – диэт, куукунатыгар ыстанна.
Кыргыттарын билсиһиигэ бэлэмнии барда дии санаатым. Бэйэм да бэлэмэ суох эбиппин. Саатар, эбиэккэ горуох миин испитим иһим сараччы үллэн хаалбыт. Тута туалекка ааһыахха эмиэ сатамньыта суох...
Ээ, чэ, хата, ким да суоҕар...
Ыллым да, «от всей души» бардырҕатан-бирдиргэтэн, мээтиргэтэн-маатырҕатан кэбистим. Сыт-сымар дьаабы! Тута сылдьар паапкабынан салгыны ыраастаатаҕа буолан уҥа-хаҥас далбаатаатым.
Ол дьаабылана ахан турдахпына – аан аһылла түстэ да, Лэкиэһим аҥаар илиитигэр сампааннаах, атыныгар хоруопка кэмпиэттээх:
– Вот и мы! – диэн саҥалаах көтөн түстэ.
Уоту аһа баттаата! Арай кыараҕас баҕайы хоско икки кыыс, муннуларын саба туттан баран, миигин көрүөхтэринэн көрөн олороллор эбит буолбаат?! Харса суох таһырдьа ойдум... Билсиһиибит бүттэҕэ ол!
Күрүлгэн. – 2008. – 2-с №.
