Киирии

Киирии

Бэс ыйын 9 күнүгэр Нерюнгри аттынааҕы Угольное диэн даача бөһүөлэгэр киһи куйахата күүрэр улахан быһылаана таҕыста. 60 саастаах Сергей Ростовцев диэн киһийдэх күрүлүүр күнүс бүтүн ыалы ытыалаата. Бэс ыйын 10 күнүгэр өлөрүөхсүтү даача бөһүөлэгэр полиция үлэһиттэрэ булбуттара. Ростовцев полициялары кытары ытыаласпыт уонна тиһэҕэр бэйэтигэр тиийинэн өлбүт.Бэс ыйын 11 күнүгэр Бүлүү Хаҕыныгар 54 саастаах киһи эмиэ 45, 28, 27 уонна 26 саастаах 4 киһини ытта, икки киһи балыыһаҕа кирэн өллө. Бытовой иирсээн кэннэ ытыалаабыт диэн сабаҕалыыллар. Холуобунай дьыала көбүтүлүннэ.

Неизвестнэйдэр диэн дьиэ кэргэн: аҕалара, 38 саастаах Артём Неизвестнэй, кини хат кэргэнэ Татьяна уонна 14 саастаах кыыстара Ксения тута өллүлэр. Татьяна ийэтэ, 64 саастаах Галина Прудченко кыл мүччү куотан, бааһырыылаах балыыһаҕа киирбитэ. Дьолго, кини доруобуйата этэҥҥэ.

str

Ис дьыала министиэристибэтигэр иһитиннэрбиттэринэн, Неизвестнэйдэр Сергей Ростовцевы кытары тыл-тылларыгар киирсибэккэ этиспиттэр. Онуоха Сергей Ростовцев 12-лээх саанан ытыалаабыт. Билигин Силиэстийэлиир кэмитиэт быһылаан төрдүн-төбөтүн сиһилии үөрэтэр. Неизвестнэйдэр дьиэ кэргэни Новосибирскай куоракка илдьэн харайыахтара.

Нерюнгри олохтоохторо кэпсииллэринэн, быһылаан буолар күнүгэр Галина Прудченко күтүөтүн -- Артёму кытары ас-үөл атыылаһа маҕаһыыҥҥа барбыттар. Дьиэҕэ ыал ийэтэ Татьяна уонна кыыстара Ксюша хаалбыттар. Маҕаһыынтан эргиллибиттэрэ Татьяналаах Ксюша номнуо өлөн сыталлар эбит. Артёму тиэргэн аанын арыйаатын кытары иккитэ искэ ыппыт. Галина кыл мүччү куотан биэрбит. Сергей Ростовцев ийэлээх кыыһы дьаһайан баран, дьиэлээхтэр кэлэллэрин манаан олорон ытыалаабыт. Олохтоохтор Сергей Ростовцевы уруккуттан сидьиҥ, төбөтүнэн хаппат курдук билэллэр. Кини психдиспансерга учуокка турар эбит. Бииргэ төрөөбүт эдьиийэ көһөн барыытыгар “Сергейи илдьэ бар, кини манна хааллаҕына туох да үтүө тахсыа суоҕа” диэн сэрэйбиттэр. Өлөрүөхсүккэ дьиҥэ хаста да сайабылыанньа суруйа сылдьыбыттар эбит. Дача олохтоохторун кытары барыларын кытары иирсэр кэмэлдьилээх эбит. Былырыын биир ыалларын сүгэлээх сырсыбытын бары билэллэр эбит. Уопсайынан, бу киһийдэх кыыл курдук, кимиэхэ баҕарар саба түһэр сидьиҥ санаалаах эбит. Билигин силиэдэбэтэллэр тустаах уорганнар тоҕо уопсастыбаттан эрдэ-сылла туораппатахтарын эҥин бэрэбиэркэлииллэр. Туох да диэбит иһин, билигин бүтүн ыалы имири эспит киһийдэҕи сокуон хараҕынан эппиэккэ тардыбаттар. Арай ол дойду сокуонунан эппиэттиир ини диэн уоскутунабыт.

Татьяна баһаарынай сулууспаҕа буҕаалтырынан үлэлээбит, оттон Артем “Якутуголь” хампаанньаҕа оробуочайдаабыт. Соҕотох оҕолоро Ксюша 9-с кылааһы эрэ бүтэрээхтээбит. Неизвестнэйдэр от ыйын 8 күнүгэр төрүөхтээх уол оҕолорун кэтэһэ сылдьыбыттар.

Кэнники сылларга маннык ыар быһылааннар дойду үрдүнэн олус дэлэйдилэр. Былырыын ыам ыйын 24 күнүгэр Хаҥалас улууһун Булгунньахтааҕар биир биэнсийэлээх 5 киһини, ол иһигэр биир оҕону ытан өлөрөн баран бэйэтигэр тийиммитэ. Өлөрүөхсүт эмиэ соҕотоҕун олорор, дьону кытары куруук иирсэр киһийдэх этэ.

upload 02 pic905 895x505 53101

2010 сылтан дойдуга маннык маассабай өлөрүүлэр чаастатык буолуталаатылар.

2010 сыл сэтинньи 4 күнүгэр Краснодар кыраайыгар Кущевская станицаҕа Сервер Аметов диэн пиэрмэр дьиэтигэр 12 киһи өлүгүн булбуттара, ол иһигэр 4 оҕо. Өлөрүөхсүттэр дьону ытыалаан баран дьиэҕэ уот анньыбыттар этэ. Буруйдаахтарынан ОПГ бөлөҕөр киирсэр 6 бандьыыт (Ростов уобалаһыгар уонна Краснодар кыраайыгар дьарыгырбыттар) ааттаммыта. Бандьыыттар баһылыктара Сергей Цапок, кини икки куомуннааҕа, Владимир Алексеев уонна Игорь Черных үйэлэрин тухары хаайыыга утаарыллыбыттара (Цапок 2014 сыллаахха хаайыыга тымыра быһа баран өлбүтэ, ол сыл Черных бэйэтигэр тиийиммитэ). Владимир Цеповзя уонна Николай Цапок 20-лии сылга барбыттара, Владимир Запорожец – 19.

str1

2011 сыл тохсунньу 21 күнүгэр Ставрополь куорат биир чааһынай дьиэтигэр эмиэ ытыллан өлбүт 8 киһи өлүгүн булбуттара. Өлүөхсүттэр – урут хаста да сууттана сылдьыбыт, криминальнай эйгэҕэ киэҥник биллэр Владимир Слизаев – Хан уонна кини дьиэ кэргэнэ, хамначчыттара. Икки нэдиэлэлээх Слизаев сиэнин тыыппатахтар этэ, оттон 8 саастаах оҕо саһан тыыннаах хаалбыта. 2012 сыллаахха Слизаев тус суоппара Роман Губарев диэн киһи үйэтин тухары хаайыыга сытыйарга уураахтаммыта.

2011 сыл от ыйын 25 күнүгэр Тула куоракка 5 киһи өлүгүн булбуттара: 5-9 саастаах үс оҕо, кинилэр ийэлэрэ, 31 саастаах Мария Шкарупа уонна оҕолор эбэлэрэ. Кинилэри барыларын бастарын өтүйэлээн сырдык тыыннарын быспыттар этэ. Атырдьах ыйын 3 күнүгэр дьиэнэн сылдьан көмпүүтэр өрөмүөннүүр 19 саастаах Иван Иванченко тутуллубута. Кини Мария Шкарупаны кытары этиһэн баран өлөртөөбүтүн билиммитэ. Иванченко олоҕун тиһэх күннэригэр диэри хаайыыга олоруохтаах.

2011 сыл атырдьах ыйын 6 күнүгэр Красноярскай кыраай Северо-Енисейскэй оройуонугар биэс киһи өлүгүн булбуттара: 3 ойууру кэрдээччи, ньиэби таҥастыыр быраҕыллыбыт собуот харабынайа уонна Епишино бөһүөлэктэн чугас суол кытыытыгар сытар эр киһини. Сотору буолаат, ыаллыы сытар Мотыгинскай оройуоҥҥа уорбаланааччылары: эмиэ дэлээнэ үлэһиттэрин Владимир Королёву, Николай Агеевы уонна Евгений Гагаркины туппуттара. Силиэстийэ быһаарбытынан, Королёв арыгылаан баран иирсээн түмүгэр икки табаарыһын кытары ытыалаталаабыттар уонна суолга тахсан баран ааһан иһэр массыынаны тохтоппуттар, суоппары ытан өлөрөн баран, массыынатын күрэппиттэр. Королёв үйэтин тухары хаайыыга харалларга уураахтаммыта, Агеев уонна Гагаркин – 20,19 сылга.

2012 сыллаахха сэтинньи 7 күнүгэр Москуба куорат Чермянскай уулуссатыгар “Ригла” фармацевтическай хампаанньа юриһа Дмитрий Виноградов кэллиэгэлэрин ытыалаабыта. Ол түмүгэр 6 киһи өлбүтэ, биир дьахтар улаханнык эчэйбитэ. Өлөрүөхсүтү тэрилтэ харабынайдара ытан бааһырдыбыттара. 2013 сыллаахха кинини үйэтин тузары хаайыыга ыыппыттара.

2013 сыл муус устар 22 күнүгэр Белгород куорат килбэйэр киинигэр урут сууттана сылдьыбыт Сергей Помазун диэн Белгород олохтооҕо “Охота” диэн булт маҕаһыынын атыылаһааччыларын уонна ааһан испит дьону ытыалаабыта уонна массыынатыгар олорон куоппута. Түмүгэр 6 киһи суорума суолламмыта. Сарсыныгар Помазуну туппуттара уонна олоҕун устата хаайыыга олороругар бириигэбэрдээбиттэрэ.

2015 сыл муус устар 17 күнүгэр Башкортостан Кумертау куоратыгар итирэн баран быһахтаспыттара. Ол түмүгэр 5 киһи өлбүтэ, кинилэр истэригэр оҕолор эмиэ бааллара. Өлөрүөхсүттэр суолларын кистии сатаан өлүктэргэ исппири кутан баран кокос сыыһын бырахпыттар уонна умаппыттар. Өлөрүөхсүттэр – 21 саастаах Константин Сурков уонна 23 саастаах Сергей Букаев 2016 сыллаахха олохторун устата хаайыыга сытыйалларыгар уураахтаммыттара.

str2

2015 сыл ыам ыйын 30 күнүгэр Тула куорат таһынааҕы Косая Гора диэн бөһүөлэккэ полиция үлэһиттэрэ элбэх оҕолоох дьиэ кэргэн биэс чилиэнин – 10 уонна 11 саастаах кыргыттар, кинилэр 5 саастаах сурустара, 29 саастаах ийэлэрэ уонна 49 саастаах эбэлэрэ өлө сыталларын булбуттара. 7 саастаах уол оҕо уонна ийэлэрин кытары бииргэ дьукаахтаһан олобут 37 саастаах киһи улаханнык эчэйэн балыыһаҕа суһаллык киирбиттэрэ. Полицияларга өлбүт кыргыттартан биирдэстэрэ тыллаабыт. Өлөрүөхсүтү быһылаан буолбут сирин таһыттан ир суолун ирдээн булан хаайбыттара. Арассыыйаҕа сокуоннайа суох олорор, 29 саастаах Узбекистан олохтооҕо Сирожиддин Шералиев олоҕун устата оһуобай эрэсиимнээх хаайыыга олорорго бириигэбэрдэммитэ.

2015 сыл атырдьах ыйын 4 күнүгэр Аллараа Новгород куоракка 6 оҕо уонна кинилэр ийэлэрэ - Юлия Белова эттэммит өллүктэрин булбуттара. Ол күн Владимирскай уобалас Гороховец куоратыгар оҕолор аҕаларын ийэтэ өлө сытарын булбуттара. Өлөрүөхсүт – дьиэ кэргэн баһылыга Олег Белов. Бу дьиэ кэргэн урукку өттүгэр тииһиммэт диэн уччуокка турбут, аҕалара кэргэнин хаста да үлтү сынньа сылдьыбыт. Быһылаан буолар күнүгэр Юлия кэргэнигэр “арахсарга сайабылыанньа биэрдим, оҕолор миигин кытары хаалаллар” диэбитин абааһы көрөн өлөртөөбүт. Белов 2016 сыллаахха хаайыллыбыта. Бириигэбэрэ – олоҕун устата хаайыыга сытыйар.

2016 сыл муус устар 24 күнүгэр Самара уобалаһын Сызрань оройуонун Ивашевка дэриэбинэтин биир дьиэтигэр 3 эр киһи уонна 3 дьахтар өлүгэ көстүбүтэ. Өлүөхсүттэр – Самара уобалаһын ИДьМ Сүрүн управлениетын ыстаабын начаалынньыгын солбуйааччы, полковник Андрей Гошт уонна кини уруулара. Быһылаан буолбут сириттэн Гошт сэттэ саастаах сиэн балтын суһаллык комаҕа илдьибиттэрэ. Гошт дьиэтин халыыр сыаллаах саба түспүттэрэ биллибитэ. 2017 сыллаахха маассабай өлөрүүгэ уонна дьини халааһыҥҥа 4 олохтоох дьон сууттамыта: Махмадали Ахмадов, Роман Фаталиев (үйэлэрин тухары хааллыбыттара), Ислам Бабаев (25 сылга барбыта) уонна Охран Зарабов (26 сылга хааллыбыта).

str3

2016 сыл ыам ыйын 8 күнүгэр Москуба уобалаһын Егорьевскай оройуонун Челохово дэриэбинэтигэр быраҕыллыбыт пиибэ собуотун аттыгар мотобайкердар мотосезон сабыллыытын бэлиэтээри кэнсиэрдиир былаһаакканы бэлэмнии сылдьыбыттар. Мотоциклистар уонна олохтоох дьон икки ардыларыгар иирсэн тахсыбыт. Ол кэннэ биир эр киһи дьиэтиттэн “Сайга” сааны аҕалан баран, 5 байкеры ытыалаабыт. Байкердары ытыалыыр кэмигэр икки дьахтар көрөн турбутун өлөрүөхсүт тыыппатах. Ол күн биир ЧОП үлэһитэ Илья Асеев тутуллан хааллыбыта. Бу айдааннаах быһылааны Москуба уобаластааҕы суутугар бирисээгэлээх сэтээтэллэр кыттыылаах көрбүттэрэ. 2017 сыл сэтинньи 20 күнүгэр сэтээтэлэр Агеевы олоҕун тухары хаайыыга харалларыгар уураахтаабыттара. Маны таһынан суут Асеев эмсэҕэлээбиттэргэ 3-түү мөл. солк. моральнай хоромньуну төлүүргэ эппитэ. Уопсайа эмсэҕэлээбиттэргэ 15 мөл. материальнай уонна моральнай хоромньуну төлүөхтээх.

2016 сыл от ыйын 13 күнүгэр Хабаровскай кыраай Солнечнай оройуонун Березовай бөһүөлэгэр 22 саастаах Александр Сержантов уонна Олег Петров үлэни биэрээччилэр халыыр сыаллаах саба түспүттэр. Ол түмүгэр хаһаайыннарын, биир пиэрмэри уонна икки туоһуну ытыалаабыттар. Хабаровскай кыраайын суута атырдьах ыйын 11 күнүгэр өлөрүөхсүттэри олохторун тухары хаайыыга олороллоругар уураахтаабыта.

str4

2017 сыл бэс ыйын 3 күнүгэр Тверь уобалаһын Конаковскай оройуонун Редкино бөһүөлэгэр “Өктөөп 50 сыла” СОТ түөлбэтигэр биир эр киһи 9 киһини ытан өлөрбүтэ. Ол күн уорбаланааччы Сергей Егоровы учаскыабай уонна ГИБДД үлэһиттэрэ туппуттара. Силиэстийэ кэмигэр биллибитинэн, бэс ыйын 3 күнүгэр Егоров даачалаахтары кытары биир учаастакка арыгы иһэ олорбут. Ол олорон тыл-тылларыгра киирсибэккэ этиһэн турбуттар. Улаханнык өһүргэммит, кыыһырбыт Егоров бэйэтин даачатыгар барбыт уонна карабиннаах төннөн кэлэн баран бииргэ аһаабыт дьонун ытыалаталаабыт. Марина Коныгина диэн дьахтар дьиэҕэ орон анныгар киирэн саһан кыл мүччү тыыннаах хаалбыт. Силиэстийэлир кэмитиэт Егоровка ХК 105 ыст. 2 ч. (“2 уонна онтон элбэх киһини өлөрүү”) холуобунай дьыаланы көбүппүтэ. Психиатрическай эспэртиисэ Сергей Егоров өлүөр өйдөөҕүн билиммитэ. 2017 сыл балаҕан ыйын 12 күнүгэр Тверь уобаластааҕы суута Егоровы тоҕус киһи тыыныгар турбутугар буруйдааҕынан аахпыта уонна олоҕун тухары хаайыыга харалларыгар уураахтаабыта. Маны таһынан 10 мөл. солк. моральнай хоромньуну төлөтөргө уураахтаабыта.

2018 сыл олунньу 18 күнүгэр Дагестан Кизляр куоратыгар православнай итэҕэллээхтэр Бырастыылаһар баскыһыанньа бырааһынньыгын кэмигэр Свято-Георгиевскай таҥара дьиэтигэр үҥэ сырыттахтарына киирэн ытыалаабыттар. Ол түмүгэр биэс дьахтар өлбүтэ. 4 киһи, ол иһигэр полиция уонна Росгвардия үлэһиттэрэ бааһырбыттара. Ытыалаабыт киһи саһа сатаабытын полициялар суох оҥорбуттара. Өлөрүөхсүт 22 саастаах Дагестан Рарумовскай оройуонун Рассвет сэл. Олохтооҕо Халил Халилов этэ.

Тарҕат:

Комментарии

Защитный код Обновить

Болҕойуҥ ! Чэпчэтиилээх сурутуу саҕаланна!

kyym podpiska