Сайыммыт бастакы нэдиэлэтэ куйаас буолла. Сөтүөлүүргэ анал пляжтар арылла иликтэринэ, ууга көҥүл киирээччилэр элбээтилэр.
СӨ быыһыыр сулууспата иһитиннэрэринэн, сөтүөлүүргэ анамматах ууга киирии алдьархайга тиэрдиэн сөп.
Бэс ыйын 5 күнүгэр Кэҥкэмэҕэ биир эдэр эр киһи ууга былдьанна. Кинини кытта сылдьыбыт доҕотторо кэпсииллэринэн, сарсыарда эрдэ кини балааккаттан тахсаат, сэрээккэлээбит уонна ууга киирэргэ санаммыт. Ол эрээри, уоллара номнуо ууга тимирэн эрдэҕинэ доҕотторо быыһыы сатаабыттар даҕаны, хомойуох иһин хойутаан хаалбыттар.
СӨ быыһыыр сулууспата иһитиннэрэринэн, быһылаан тахсыбыт сиригэр водолазтар бөлөхтөрө тиийбиттэр. Уу аннынааҕы анал чинчийэр аппаратынан быһылаан тахсыбыт сиригэ бэрэбиэркэлиир үлэ ыытылынна. Түмүгэр, водолазтар өлүгү булан, дьонугар тиэртилэр.
«Билиҥҥи туругунан, официальнай пляж арылла илик, оттон дьон сөтүөлээри ыксыыр. Өйдөөҥ: тымныы ууга эт-сиин тымныйыыта, иҥиир тардыыта үөдүйэн, киһини өлүүгэ тиэрдиэн сөп.
Көҥүллэммэт: сөтүөлүүргэ анамматах уонна бобуулаах ууга киирии, арыгы иһэн баран сөтүө, анамматах сирдэргэ араас тутуулартан ууга ыстаныы. Улахан киһи көрүүтэ-истиитэ суох оҕолору ууга киллэрии уонна уу таһыгар сырытыннарыы бобуллар. Билбэт уугар умсуу кутталлаах: төбөҕүнэн сааллан өйгүн сүтэрэн, онтон өлөн хаалыахха сөп. Өйдөөҥ: уу сыыһалары бырастыы гыммат», - диэн СӨ быыһыыр сулууспатын көрдүүр-быыһыыр салаатын 7-с эрэсэрээттээх водолаз Алексей Белин иһитиннэрэр.
Суһал сулууспа биир кэлим нүөмэрэ - «112», СӨ Быыһыыр сулууспатын нүөмэрэ: (4112) 45-90-19
СӨ Быыһыыр сулууспатын пресс-сулууспата
