Соторутааҕыта кэллиэгэм олус үчүгэй оҥоһуулаах хаар дракон хаартыскатын уонна ааптарын нүөмэрин ыытта. Бу мифическэй кыыл аан дойдуга үүнэр сыл бэлиэтэ буоларынан, хараҕым уоттана түстэ. Онон Хаар Дракону «айааһааччыны» кытта билсэн кэбиһиҥ.
45 саастаах Игорь Михайлов - икки оҕолоох ыал аҕата. Уус Майда улууһун киинигэр авиацияҕа куттал суох буолуутун хааччыйар сулууспа иниспиэктэринэн үлэлиир. Бастакы хаар оҥоһугун Ыт сылыгар, ол эбэтэр 2018 сыллаахха, оҥорбут. Онтон ыла бөһүөлэк дьонун уонна дьиэ кэргэнин үөрдээри, сыл ахсын оҥорор.
Быйыл икки Дракону оҥорон, биирин бөһүөлэк киин болуоссатыгар, биирин тиэргэнигэр туруоран, үөрэн-көтөн олорор. Ол туһунан төлөпүөнүнэн кэпсээтэ:
- Бэйэм иллэҥ кэммэр уруһуйдуурбун наһаа сөбүлүүбүн. Аҕам эмиэ кыралаан уруһууйдуур этэ. Улахан кыыһым уруһуй оскуолатыгар үөрэнэр. Ол эрээри хаар оҥоһуктарбар кими да чугаһаппаппын. Барытын бэйэм оҥорорбун ордоробун. Араас өҥнөөх коллерынан пульверизаторынан ыстаран кырааскалыыбын.Тиэргэҥҥэ турар Драконум уһуна – 9 м кэриҥэ, үрдүгэ - 1,5 м курдук. Хаары кутар, чиҥэтэр күммүн аахпатахха, биэс күн устата оҥорбутум. Тымныыга, биллэн турар, ууну кытта үлэлиир уустуктардаах. Ол да иһин кырааскалыырга элбэх бириэмэ барар. Болуоссакка турар Драконум маннааҕар улахан. Быйыл хаар оҥоһук күрэһигэр кыттыахпын наһаа баҕарбытым даҕаны, сайаапка ыыппакка хаалбытым. Түмүгэ тахсан бүппүт этэ, - диэн Игорь Леонидович сэһэргээтэ.
Ааптар үүнэр сыл бэлиэлэринэн хаар скульптураларын аныгыскы Ыт сылыгар диэри оҥорор санаалаах. Оччотугар кини улууһун олохтоохторун, дьиэ кэргэнин бэйэтин айымньыларынан өссө 2030 сылга диэри үөрдэ туруоҕа. Биһиги киниэхэ бу үтүөкэн баҕа санаата туолан иһэригэр ис сүрэхпититтэн баҕарабыт.
Кэпсэттэ Күндэли.
