Саха сирин бырабыыталыстыбата Владимир Путин “ыам ыйынааҕы ыйааҕын” олоххо киллэрэргэ этиилэри тобулла. Онуоха 598 млрд солк. үп ирдэнэр.
Санатар буоллахха, Владимир Путин дойду 2024 сылга диэри сайдыытын быһаарар ыйаахха илии баттаабыта. Бырабыыталыстыба бу сыл алтынньы 1 күнүгэр диэри 2024 сылга диэри Арассыыйа социальнай-экэнэмиичэскэй сайдыытын сылыктыахтаах уонна Кабмин сүрүн хайысхаларын тобулуохтаах. Бэс ыйын 16 күнүгэр диэри эрэгийиэннэр уопсай федеральнай былааҥҥа киллэтэрэргэ этиилэрин ыытыахтаахтар этэ. Саха сирэ 12 тосхолтон турар этиилэрин ыыппыта.
Экэниэмикэ миниистирэ Майя Данилова ити тосхолого доруобуйа харыстабыла, үөрэхтээһин, олорор дьиэни тутуу, экология, билим, сыыппара экэниэмикэтэ, аччыгый уонна орто урбаан сайдыыта, магистральнай инфраструктураны сайыннарыы уо.д.а. эрэгийиэни ордук долгутар боппуруостара киллэриллибиттэрин этэр. Онуоха экэниэмикэ министиэристибэтэ ааҕарынан, ити тосхоллору олоххо киллэрэргэ уопсайа 598 млрд солк. ирдэнэр эбит. Маны таһынан, магистральнай инфраструктураны – массыына , тимир суолларын тутууга, авиацияны сайыннарыыга, саҥа ЛЭПтэри тутууга эбии 700 млрд солк. ирдэнэр. Маны таһынан, Саха сирэ ити бырагыраамаҕа сорох улуустары гаастааһыны киллэрэри туруорсар санаалаах.
“Хаалбыт икки нэдиэлэҕэ биһиги федеральнай былаастары кытары биһиги бырайыактарбытын тиһэх докумуоҥҥа киллэртэрэр курдук үлэлэһиэхпит. Ол кэннэ федеральнай үптэн биһиэхэ төһө үбү көрөллөрүн көрөн үлэбитин тобулуохпут”, — диэтэ хотун Данилова.
