Бэҕэһээ, сэтинньи 19 күнүгэр, Саха сирин бырабыыталыстыбатыгар буолбут муньахха «Об утверждении коэффициента индексации и размеров отдельных видов социальных выплат на 2019 год, осуществляемых за счет средств государственного бюджета» уураах бырайыагын көрдүлэр.
Онно ыйылларынан, 2019 сыл тохсунньу 1 күнүттэн харахтарынан инбэлииттэргэ (олох көрбөттөргө) биэнсийэлэригэр ыйдааҕы эбиигэ индексация коэффициенэ бигэргэннэ. Маны таһынан социальнай босуобуйа, тыыл бэтэрээннэригэр, реабилитацияламмыт дьоҥҥо уонна бэлиитикэ репрессиятыгар түбэспиттэргэ эбии социальнай өҥө суумата, сорох гражданнарга социальнай айан төлөбүрүн сыаната уонна ыйдааҕы оҕо босуобуйатын кээмэйдэрэ бигэргэннилэр.
Маны таһынан 10-тан элбэх оҕолоох дьиэ кэргэҥҥэ (ол иһигэр 23 саастарыгар диэри күнүскү үөрэххэ үөрэнэр устудьуоннардаах, иитимньилээх ыалга) социальнай хантыраак быһыытынан тырааныспар ылалларыгар анаан биир кэмнээх судаарыстыбанай социальнай көмө быһыытынан көрүллэр харчы кээмэйэ бигэргэннэ.
“2018-2022 сс. Саха сирин гражданнарыгар социальнай көмө” судаарыстыбаннай бырагыраама чэрчитинэн социальнай көмөнү индексациялааһыҥҥа 150 мөл. солк. тахса үп көрүллүбүтэ. Ити харчы Саха сирин 200 тыһ. тахса киһитигэр туһуланыаҕа. Бу туһунан үлэ уонна социальнай харалта миниистирэ Елена Волкова иһитиннэрдэ.
