Үбүлээһин бу сылтан саҕалаан үс сыл устата федеральнай бүддьүөттэн тыырыллыа.
Муус устар 26 күнүгэр РФ Бырабыыталыстыбатын бэрэссэдээтэлэ Дмитрий Медведев, эрэгийиэннэргэ фермердэр хаһаайыстыбалара уонна тыа сиригэр урбааны сайыннарыыга федеральнай бүддьүөттэн үбүлээһин көрүллэрин туһунан дьаһалга илии баттаата. 2019-2021 сылларга уопсайа 14 млрд солк тыырыллара былааннанар. Бу үбү үс сыл иһигэр дойду 83 субъегар үллэриэхтэрэ. Ол курдук, 2019 сылга 5,37 млрд солк, 2020 сылга — 3,84 млрд солк, 2021 сылга — 4,61 млрд солк тыырыллыа.
Саха сирэ үс сыл иһигэр 287 мөл солк ылыа. Бу сылга 95,8 мөл солк, кэлэр сылга — 103,8 мөл солк, оттон 2021 сылга — 87,5 мөл солк көрүллүө.
