Айсен Николаев Саха сиригэр “Сибиир күүһэ” гаас утаҕын эпэрээтэрэ буолар кыахтаах, “Газпромҥа” быһаччы бас бэринэр саҥа юридическэй сирэйи тэрийэр наадатын эттэ.
“Гааһы-ньиэби хостуурга, ол эбийиэктэрин тутарга федеральнай суолталаах “Газпром” араас структуралара дьарыктаналлар – “Газпром добыча Ноябрьск»”уонна ”Газпром трансгаз Томск”.Оттон “Сибиир күүһэ” бырайыагынан дьарыктанар уонна ити гаас утаҕынан тиэрдиини иилиир тэрилтэ оруолун толоруон сөптөөх тэрилтэ Саха сиригэр суох", - диир Ил Дархан.
“Газпром добыча Ноябрьск” Чайыҥдатааҕы ньиэп-гаас баайдаах сиргэ хостооһунан дьарыктанар, оттон “Газпром трансгаз Томск” тэрилтэ — гаас утаҕын тутуунан.
Аҕа баһылык этэринэн, кини бу боппуруоһу эрдэ көтөҕө сылдьыбыт, ол гынан баран боппуруос ситэ быһаарыллыбатах, тоҕо диэтэххэ оччолорго гаас утаҕа саҥа тутулла турара. Билигин утаҕы тутуу түмүктэммитин кэннэ уонна онно күөх төлөнүнэн толоруу саҕаламмытынан, бу боппуруоска хос төннөр уолдьаспыт.
“Ахсынньы 1 күнүгэр күөх төлөн номнуо Кытайга ааһыаҕа. Инньэ гынан, бу боппуруоһу быһаарар уолдьаста. Саҥа тэрилтэ “Газпром” самалык тэрилтэтэ буолуохтаах. Мин санаабар, биһиги өрөспүүбүлкэбит иһигэр ити боппуруоһунан быһаччы дьарыктанар, эрэгийиэҥҥэ саҥа үлэ миэстэтин таһаарар уонна нолуок төлүүр кыахтаах саҥа юридическэй сирэй баар буолуохтаах” , — диэн Ил Дархан тоһоҕолоото. “Газпром” бөлөххө 17 гааһы тиэрдэр самалык тэрилтэ киирсэр. Хампаанньаҕа биир эрэгийиэни бэрийэр хампаанньалар бааллар, ол эрээри кинилэр хас д эрэгийиэни быһаччы хабан үлэлииллэр. Арассыыйа илиҥҥи өттүгэр бары магистральнай гаас утаҕын “Газпром трансгаз Томск” тэрилтэ салайар.
“Сибиир күүһэ” магистральнай гаас турбата Уһук Илин уонна Кытай туһанааччыларыгар гааһы биэрэр Иркутскайдааҕы уонна Саха сиринээҕи кииннэр нөҥүө холбонон үлэлиир. Магистраль уһуна 3 тыһ. км тахса. Турба Иркутскай, Амыр уобластарынан уонна Саха сиринэн ааһар.
