“Убаһа этэ” диэн тарантинолыы, гай ричилии тыыннаах тэттик киинэлэри устан уонна интэриниэт ситимигэр сахалыы киинэлэри ырытан дьоҥҥо-сэргэҕэ биллибит эдэр режиссер Николай Ате (Корякин) тохсунньу 25 күнүгэр Саха сирин киинэ тыйаатырдарыгар тахсыбыт “Тимир” диэн драмедита аҕыйах хонук иһигэр 4 мөлүйүөнтэн тахса солкуобайы киллэрбит.
Киинэ аҥаардас тохсунньу 27 уонна 28 күннэригэр, өрөбүллэргэ, 2,6 мөлүйүөн солкуобай дохуоттаммыт. Ити кэм иһигэр “Тимири” барыта 12 тыһыынчаттан тахса киһи көрбүт! Ол туһунан Киинэ пуондатын Кэлим автоматизированнай информационнай тиһигэ (ЕАИС) суруйар.
Эмиэ тохсунньу 25 күнүгэр көрдөрүүгэ тахсыбыт, режиссер Михаил Локшин Булгаков айымньытынан устубут “Мастер и Маргарита” киинэтэ харчы киллэриитинэн иккис миэстэҕэ тахсыбыт. Ити киинэ эмиэ ааспыт икки өрүбүлгэ (итини “первый уикэнд” дииллэр) 838 000 солкуобайы киллэрбит.
Хаартыска: Улус Медиа
