Киирии

Киирии

«Зима начинается с Якутии» бүтүн Арассыыйатааҕы бэстибээл чэрчитинэн, сэтинньи 25 күнүгэр Дьокуускайга, «Бриллианты Якутии» диэн норуоттар икки ардыларынааҕы муус оҥоһук күрэһэ ыытыллыа.

Арассыыйаттан, Канадаттан, Кытайтан, Монголияттан уонна Белоруссияттан 25 хамаанда кыттара күүтүллэр. Быйылгы күрэс сүрүн тиэмэтэ — «Легенда зимы». Кыттааччылар скульптураларын үс күн оҥоруохтара.

Күрэс икки номинациялаах: муус уонна хаар оҥоһук.

Кыттааччылар үлэлэрин куорат олохтоохторо уонна ыалдьыттара 202 микрорайоҥҥа көрөн сыаналыахтарын сөп.

Күрэс түмүгэ уонна кыайыылаахтары наҕараадалааһын ахсынньы 1 күнүгэр 15.00 чаастан 202 микрорайоҥҥа буолуоҕа. Бастыҥ үлэлээх ааптардар харчынан бириэмийэ ылыахтара уонна мэтээл кэтиэхтэрэ.

Ааспыт сыллаахха ыытыллыбыт күрэскэ кэрэ аҥаардар хамаандалара кыттыыны ылбыта. Хамаанда чилиэнэ  Александра Неустроева, күрэскэ кыттыыга  үөрүйэх атастаһыытын бэлиэтиир: “Бу күрэскэ быйыл иккиһин кыттабыт. Эскизпыт номнуо бэлэм. Ол курдук, саха остуоруйатын дьоруойдарын таллыбыт. Техническэй өттүнэн ыарахаттар баар буолуохтарын сөп. Мууһу уунан холбуурга хайдах хаалааччы. Бириистээх миэстэҕэ тиксибэтэхпитинэ даҕаны, элбэх үөрүйэҕи ылыахпыт диэн эрэнэбит”.

Худуоһунньук-маастар Алексей Капитонов муус оҥоһугар таптал тиэмэтин арыйар былааннаах: “Дьокуускайга маннык күрэстэр ыытыллаллара олус үөрдэр. Хас биирдии маастар кини үлэтин аан дойду таһымыгар сыаналыылларын баҕарар буолуохтаах. Мин чугас дьоммор тапталбын муус оҥоһукпар көрдөрө сатыам”.

Дьүүллүүр сүбэ састаабыгар аан дойдутааҕы таһымнаах маастардар, Арассыыйа уонна Саха сирин худуоһунньуктарын Сойууһун бэрэстэбиитэллэрэ, скульптордар киирдилэр.

Критерийдэр: ыйыллыбыт тиэмэни арыйыы, матырыйаалы сөптөөхтүк туттуу уонна оҥоһук тас көстүүтэ, эстетическэй сабыдыала.

Тарҕат:

Комментарии

Защитный код Обновить