“Алмаас” култуура уораҕайыгар Бүлүү улууһун күннэригэр анаммыт дьоро киэhэ олус иhирэхтик, киһи санаатын көтөҕөрдүү, дьиэрэтиилээхтик ыытылынна.
Бу киэhэ Бүлүү курдук дьиҥ саха улууһун урана, чаҕылхай талааннара, бэйэлэрин ылбаҕайдык көрдөрдүлэр. Бүлүүлэр ураты чаҕылхай үлэлэрин – кылтан таҥыллыбыт араас ойуулаах-дьарҕаалаах сөрүөлэрин, баай ураннаах дьэрэкээн көбyөрдэрин, чаппараахтарын көрөн сөхтүбүт махтайдыбыт. Бу улуус дьонун уус-уран оҥоhуктара, кэрэ эйгэтэ ураты алыптаах күүстээхтэригэр итэҕэйдибит. Өбүгэлэрбит алгыстарын иҥэриммит, чэччийбит тэҥэ сананныбыт. Ону хаартыскаларбар көрөн итэҕэйиҥ.
Кэнсиэрт иннинэ буолбут доҕордоһууну түстүүр туомҥа, икки улуустар инники кэскиллэрин тустарынан кэрээбэт иhирэх тыл этилиннэ. Бүлүү улууһун кулубата С.Винокуров, Мииринэй улууһун кулубата Р.Юзмухаметов, улуустар оройуоннааҕы Сэбиэттэрин бэрэссэдээтэллэрэ Г.Корякин, А.Кузнецов тыл эттилэр. Онтон Бүлүү улууһун талааннарын кэнсиэрэ буолла.
Ис-истэриттэн иэйэн-куойан туран “Айархаан”, “Долун”, Бүлүү дарханнарын ансаамбыллара олохтоохторго кэрэ дьүһүйүүлэрин толордулар. Ордук Саха Өрөспүүбүлүкэтин култууратын үтүөлээх үлэһитэ А.Дегтярева салайар “Айархаан” ансаамбыла, киhи этин сааhынан киирэрдик хомустаан дьырылатан, ыллаан-туойан бу киэhэни киэргэттэ.
Тэрийээччилэр сүрдээх ылсан туран бэлэмнэммиттэрин биhирээтибит. Сахалыы ырыа тыына Айыыларынан кэрэхсэммит сырдык сылаас иргиэрдэрэ, сүрдээх да эбит. Yчүгэй ырыаттан, куппутун манньытар иргиэрдээх тылтан-дьүhүйүүттэн, дэгэрэҥнээх үҥкүүттэн харахпыт манньыйда, санаабыт дьайҕарда, сырдыкка дьулуһуубут улаатта. Онон, бу дьоро киэһэҕэ сылдьыбыт дьон олус диэн сынньанныбыт, астынныбыт.
Станислав Алексеев, Мииринэй куората.
Ааптар хаартыскалара.
