Дьокуускайга норуодунай тыйаатырдар тэриллибиттэрэ 60 сылынан декада ыытылла турар.
Ахсынньы 14 күнүгэр диэри күн аайы Саха тыйаатырын кыра саалатыгар, норуодунай тыйаатырдар бастыҥ испэктээктэрин көрдөрүөхтэрэ. Бу туһунан СӨ култуура министиэристибэтин пресс-сулууспата иһитиннэрэр.
Бастакынан С.П. Лугинова аатынан Амматааҕы норуодунай тыйаатыр артыыстара В.Е. Васильев айымньытынан “Аммаҕа саас этэ” диэн испэктээги көрдөрдүлэр. Режиссер Евгения Николаева. Испэктээккэ сэрии кэминээҕи олох көһүннэ.
Бэҕэһээ Үөһээ Бүлүүтээҕи “Олоҥхо” норуодунай тыйаатыр артыыстара А. Титаров “Хардааччы бухатыыр” диэн олоҥхо испэктээгин көрдөрдүлэр. Режиссер Татьяна Борисова.
Бүгүн, ахсынньы 13 күнүгэр П.М. Решетников аатынан Чурапчытааҕы норуодунай тыйаатыр А. Островскай “Гроза” испэктээгин көрдөрүөҕэ. Режиссер Иван Бушков. Киэһэ 18.00 чаастан саҕаланар.
Ахсынньы 14 күнүгэр 11:00 чаастан Т. Сметанин “Лоокуут уонна Ньургуһун” испэктээгэ буолар. Режиссер Елизавета Мартынова. Оттон 15:00 чаастан Н. Гоголь “Ревизор” испэктээгин көрдөрүөхтэрэ. Режиссер Валентина Бурнашева. Бэрдьигэстээҕи уонна Тааттатааҕы норуодунай тыйаатырдар артыыстара оонньуохтара.
Хаартыскаҕа “Аммаҕа саас этэ” испэктээк
