Ахсынньы 17 күнүгэр Ил Дархан Айсен Николаев Өлөөн оройуонугар “Илкит” этно-култуурунай киин арыллыытыгар кыттыыны ылла. Бу туһунан СӨ бырабыыталыстыбатын пресс-сулууспата иһитиннэрэр.
Саҥа эбийиэккэ сыаналаах улахан саал, киинэ саала, ураһа курдук быһыылаах алгыс сиэрин-туомун ыытар уонна быыстапка тэрийэр хостор бааллар. Ону таһынан, ырыаҕа-тойукка, үҥкүүгэ үөрэтэр хостордоох. Саҥа кииҥҥэ саакса уонна бибилэтиэкэ үлэлиэхтэрэ.
Ил Дархан Өлөөн оройуонун олохтоохторун 2006 сыллаахха тутуллан саҕаламмыт, күүтүүлээх киин үлэҕэ киирбитинэн эҕэрдэлээтэ. Ону таһынан, “АЛРОСА” хампаанньаҕа өр сыл тутуу үлэтигэр көмөтүн иһин, оройуон салалтатыгар бу сыллар тухары тутуу боппуруоһун туруорсан олоххо киллэрбиттэригэр махтал тылын эттэ. Саҥа кииҥҥэ аҕыйах ахсааннаах норуоттар култуураларын, үгэстэрин сайыннаралларыгар сөптөөх усулуобуйа баарын бэлиэтээтэ. “Мантан инньэ Өлөөн туһунан өрөспүүбүлүкэҕэ эрэ буолбакка, бүтүн Арассыыйаҕа, аан дойду билиэхтэрэ диэммин эрэнэбин”, – диэн эттэ.
Ону таһынан, Өлөөн оройуона Арктикаҕа эрэ буолбакка, бүтүн өрөспүүбүлүкэ үрдүнэн тэтимнээхтик сайдар оройуон буоларын бэлиэтээтэ. “Билигин манна бырамыысалынас, тыа хаһаайыстыбата, ас бородууксуйатын оҥорон таһаарыы тэтимнээхтик сайдар”, – диэтэ.
Үөрүүлээх тэрээһиҥҥэ Ил Дархан судаарыстыбаннай наҕараадалары уонна саҥа кииҥҥэ муусука тэрилин ылар сэртипикээти туттарда.
Ону таһынан, Өлөөн оройуонун баһылыга Александр Иванов, Ил Түмэн хотугу норуоттар кэмитиэтин бэрэссэдээтэлэ Елена Голомарева, “АЛРОСА” хампаанньа генеральнай дириэктэрин солбуйааччы Алексей Дьячковскай, юкагир суруйааччыта, худуоһунньук Николай Курилов эҕэрдэлээтилэр. РФ үтүөлээх артыыската, СӨ норуодунай артыыската Айталина Адамова ылбаҕай ырыатын бэлэхтээтэ.
