Бүгүн, атырдьах ыйын 26 күнүгэр, Москуба уобалаһын "Новинка" аэродромугар Саха сирин үтүөлээх артыыската Лариса Троева тута 3 Арассыыйа рекордун олохтуур санаалаах. Кини иһин үрдүнэн бастаан матассыыкыл барыаҕа, онтон — массыына, ол кэннэ иһинэн кыччыгый сөмөлүөтү тутуоҕа.
Соторутааҕыта үйэ аҥаардаах үбүлүөйүн бэлиэтээбит Лариса Троева "мин киһи кыаҕа муҥура суоҕун дакаастыахпын баҕарабын. Оннооҕор 50 сааска рекорду олохтуохха сөп дии саныыбын" , - диэбит. Рекорду олохтооһун бүгүн Москуба бириэмэтинэн 15:20 чааска саҕаланыаҕа (биһиэнинэн 21:20 ч.). Баҕалаахтар аэродромҥа кэлэн көрүөхтэрин сөп. Маны таһынан, Лариса Троева инстаграмҥа сирэйигэр @lara_troeva быһа эпииргэ көрдөрүөҕэ.
Лариса Троева Арассыыйа хас да рекордун олохтоон турар. 2011 сыллаахха бэс ыйын 12 күнүгэр кини баттаҕынан "Демьян Бедный" теплоходу 5 м соһон аан дойду рекордун олохтоон турар.
